Qiseykerdoxê Wezaretê Karanê Teberî û Heyetê Dayîşûgirewtişan ê Îranî Îsmaîl Beqayî, derheqê detayanê pêkerdişî de ke îhtîmal o mabênê Tehran û Washîngtonî de bêrê îmzakerdene wina vat: “Ma eşkenê vajî ke zafaneyê babetan de ke ameyî qiseykerdene, ma resayî encamêk.”
Verfekê Wezaretê Karanê Teberî û heyetê dayîşûgirewtişan ê Îranî Îsmaîl Beqayî, kombîyayîşê çapemenî yê hewtaneyî de ke paytextê Îranî Tehran de ame viraştene, cewabê persanê rojnamegeran da.
‘Helwêstê rayedaranê DYA de zaf reyî vûrîyayîş û nakokîyî virazîyenê’
Îsmaîl Beqayî ke vat, “Ma eşkenê vajî zafaneyê babetan de ke ameyo qiseykerdene, ma resayî encamêk”, dîyar kerd ke no encam nêyeno na mana ke do demêko nêzdî de peymane bêra îmzakerdene û qet garantîyêk çin o ke DYA do sozanê xo ser o vindera. Îsmaîl Beqayî pare kerd ke helwêstê rayedaranê DYA de zaf reyî vûrîyayîş û nakokîyî virazîyenê, nê semedî ra nê krîzî eşkenê bibe sebeb ke her tewir dayîşûgirewtişan de astengî virazîyê.
‘Ma Neqebê Hurmuzî ra girewtişê pereyê vîyartişî dima nîyê’
Îsmaîl Beqayî derheqê Neqebê Hurmuzî de zî qisey kerd û vat ke pêvînayîşanê DYA reyde de ca nêdayo detayanê Neqebê Hurmuzî û na babete dewletanê ke serê sînorê deryayî de yê, înan eleqedar kena. Îsmaîl Beqayî qiseykerdîşê xo wina domna: “Seba awankerdişê mekanîzmayêka ke vîyartişê Neqebê Hurmuzî ewle bikero û menfatanê komelê mîyanneteweyî de bo, ma zaf welatan reyde qisey kenî. Ma cehd nêkenê ke Neqebê Hurmuzî ra pereyê vîyartişê bîgîrî. Girewtişê xercî seba xizmetê gêrayîşî û awankerdişê ewleyî çîyêko zaf xozayî yo û no pereyê vîyartişî nîyo.”
