Rêxistina Heqanê Merdiman a HRANA eşkera kerd ke mîyanê 30 rojan de, Rojhelatê Kurdîstan û Îran de tewr tay 50 hedîseyê dardekerdişî û 541 hadîseyî girewtişî ameyê qeydkerdene.
Rêxistina Heqanê Merdiman a HRANA, derheqê nisbetê dardekerdiş, girewtiş û binpaykerdişê heqanê merdiman ê Rojhelatê Kurdîstanî û Îranî de raporê xo yê aşmane vila kerd.
Goreyê raporî, 30 rojanê peyênan de tewr tayê 50 hadîseyê dardekerdişî ameyê qeydkerdene ke înan ra zafêrê girewteyê sîyasî yê. Sewbîna ame vatene ke 541 hadîseyê girewtişî ameyê qeydkerdene û reyna eynê raporî de ame dîyarkerdene ke dewleta Îranî dest dayo mal û milkê 262 keyeyan ser.
Raporî de ame eşkerakerdene ke rewşa girewteyan xirabêr bîya. Sewbîna 73 reyî heqê girewteyan ameyê binpaykerdene. Mîyanê nê binpaykerdişan de astengkerdişê dermanî û neqilkerdişo kêfî yê girewteyanê sîyasîyan zî est ê. Heto bîn ra zî gulebaranê hêzanî ewleyî ver tewr tayê 7 welatijî û gedeyêk ameyê kiştene.
