Serekê DYA Donald Trumpî vera planê Îranî yê peregirewtişê keştiyanê ke Neqebê Hurmuzî ra vîyarenê narezîbîyayîş mojna û vat ke Neqeb rayîrêkê awe yo mîyanneteweyî yo. Trumpî sewbîna îdia kerd ke ê do dest bidê uranyumo zengînkerdene ser o zî.
Serekê Dewletanê Yewbîyayeyan ê Amerîka (DYA) Donald Trumpî planê Îranî yê seba girewtişê pereyî rexne kerd, dîyar kerd ke no Neqeb rayîrêkê awe yo mîyanneteweyî yo û wina vat: “Ma wazenê ke Neqeb akerde û bêpere bo.”
Îran: Gerek keştî ma ra destûr biwazê
Neqebê Hurmuzî qeraxê Îranî de ca gêno û sey cayêko derbasbîyayîşî yo stratejîk yeno zanayene ke leteyêko pîl ê bazirganîya petrol û xazê xozayî yê cîhanî tira derbas beno. Badê zêdebîyayîşê hedîseyanê leşkerî yê peyênan, hukmatê Îranî dîyar kerd ke keştîyê ke Neqeb ra derbas benê, gerek rayedarên Îranî ra destûr bigîrê.
‘Ma do uranyumê zengînkerde înan ra bigîrê’
Trumpî depoyanê uranyumê zengînkerdene yê Îranî ser o zî qisey kerd. Serekê DYA Trumpî îdia kerd ke rayberîya Washîngtonî do peynî de dest bido depoyanê uranyumî yê Îranî ser o û vat: “Ma do înan bigîrê. Lazimtîya ma bi ey çin a, ma nêwazenê zî. Îhtîmalêko pîl wexto ke ma dest da ser o, ma do îmha bikerê, labelê ma nêverdanê ke o destê înan de bimano.”
Îran: Uranyum welatî ra nêyeno vetene
Rayberîya DYA îdia kena ke Îran eşkeno nê uranyumî seba averberdişê çekanê nukleerî bixebitno. Labelê Îran îdia keno ke programê ey ê nukleerî tena seba babetanê sîvîl û aştîyaneyan o. Goreyê çimeyanê Îranî ke Reutersî reyde qisey kerdo, serekê Îranî Mucteba Xameneyî zî ferman dayo ke uranyumo zengînkerde welatî ra nêyeno vetene.
