Eşkera bi ke mela Mehmet Latîf Yeprem, o ke Pasûr de pê hêrîşê cinsî yê gedeyêk yeno sucdarkerdene, îfadeyê xo yê emnîyetî de sucê xo qebul kerdo.
Mela Mehmet Latîf Yeprem ke dewêka qezaya Pasûrî ya Amedî de melatî keno û xo sey “şêx” dano naskerdene, vera gedeyêkî herîşê cinsî kerdbi. Badê xebera Ajansa Mezopotamya Mehmet Latîf Yeprem 20ê nîsane de bi sucê “hêrîşê cînsî” ame destbendkerdene.
Mela sûcê xo qebul kerd la ame veradayene!
Mela Mehmet Latîf Yeprem badê îfadeyê xo yê Mudirîyetê Emnîyetî yê Pasûrî 21ê nîsane de sewqê dozgerîye bi. Mehmet Latîf Yeprem badê sewqkerdişê Mehkemaya Cezayanê Sulhî ya Pasûrî ame veredayene. Eşkera bi ke Mehmet Latîf Yeprem îfadeyê xo de vato: “Têkilîya ma ya cinsî wisar yan zî hamnano parin de virazîyaya. Lavaboyêka keyeyê şînî de ma kewtê têkilîye.” La rixmê nê îtîrafkerdişê zî mela Mehmet Latîf Yeprem ame veredayene.
Avûkatê Mehmet Latîf Yepremî: Demê gerrekerdişî qedîya
Avûkatê Mehmet Latîf Yepremî zî pawitişê xo de îdia kerd ke deme gerrekerdişî yê M.Y qedîyayo û îdiaya xo wina domnaye: “Kesêka ke yeno îdiakerdene mexdûr a, gerreyê aye çinî yo. Her çiqas babete çarçewaya erjan de bêra munaqeşakerdene zî, hetê ceza ra tu manayê ci çin a.”
