Sereka Komela Doktoran a Dinya (WMA) dîyar kerd ke semedê rewşa weşîye ya Nêrgîz Mihemedî bi endîşe yê û veng da rayedaranê Îranî ke bilez heqê dermankerdişê doktorî yê lazimî semedê Nêrgîz Mihemedî bidê.
Sereka Komela Doktoran a Dinya Dr. Jacqueline Kitolo, derheqê rewşa Xelatgira Nobelî Nêrgîz Mihemedî ya ke zîndanê rejîmê Îranî de ya, helwestê xo mojna.
Dr. Jacqueline Kitolo îfade kerd ke bêparverdayîşê nêweşêkî resayîşê çimdarîyê doktorî ya lazim, rewşanê winasînan de binpaykerdişêko eşkera yê heqê weşîye yo û cuya aye erzena tehlukeya cidî.
Vengdayîşê tedawîya lezgîne kerd
Sewbîna Dr. Kitolo dîyar kerd ke ganî dewlete girêdayeyê ney biba ke girewteyî zî sey her kesî û bêyî tu cîyayîyêk, bi eyn hewayî xo biresnê dermankerdişê doktorî. Dr. Jacqueline Kitolo veng da rayedaranê Îranî ke resayîşê bilez û bêsînor ê çimdarîya doktorî seba Nêrgiz Mihemedî peyda bikerê û vat: “Ganî Nêrgiz Mihemedî bierşawîya nêweşxane û bi amûranê weşan, hetê doktoranê pisporan ra bêra dermankerdene.”
Erjeno merdim vajo ke 1ê gulane de, Nêrgiz Mihemedî zîndanê Zencanî de badê ke di reyî hişê xo ra şî bîye, krîzê qelbî derbas kerd û bilez aye berd nêweşxaneyê Zencanî. Roja 5ê gulane de zî avûkata Nêrgiz Mihemedî Şîrîn Erdekanî eşkera kerd ke cuya girewteya sîyasî Nêrgiz Mihemedî mîyanê tehlukeyêka pîle de ya û nika keyeyê aye cehd keno ke aye weş bimana.
