Karkerê Madenî ke seba heqdestê xo û heqê xo yê tezmînatî vernîya Wezaretê Enerjî de dest bi grevê vêşanîye kerdbi, ameyê destbendkerdene.
Karkerê Madenî yê ke girêdayê Sendîkaya Xosere yê Karkeranê Madenî yê û şîrketê madenî yê Dorukî de xebitîyenê seba ke heqdestê înan nêameyo dayene, Eskîşehîr ra ver bi Anqara kewtê rayîr. Karkerî ke roja 8. de resayê Anqara, waştêne ver bi Wezaretê Enerjî rayîrşîyayîş virazê û uca de waştişanê xo bîyarê ziwan. Karkerî hetê polîsan ra ameyê astengkerdene. Karkerî ke bi rayîrşîyayîş ameyê vernîya awanîya Wezaretî, tîya dest bi grevê vêşanîye kerd û dîyar kerd ke heta waştişê înan bêrê caardene do çalakîya xo bidomnê.
110 madenkarî ameyê destbendkerdene
Saetanê sibayî de polîsan hêrişê karkeran kerd û 110 karkerê madenî û rayberê Sendîkaya Xosere ya Karkeranê Madenî ameyê destbendkerdene. Sendîkaya Xosere ya Karkeranê Madenî hesabê xo yê Medyaya Dîjîtal ser o eşkera kerd ke 110 karkerê madenî ameyê destbendkerdene û wina vat: “Ma karkerê madenî yê. Bi destbendkerdiş ma apey game nêerzenê.” Sewbîna zî ame zanayene ke karkerêkê madenî zî wextê destbendkerdişî de hişê xo vîndî kerdo û ey berdo nêweşxane.
