Serekê Pêroyî yê Egîtîm Sen’î Kemal Irmakî nobeda cuye de qal kerd û vat: “Ma seba waştişanê xo yê seba perwerdeyêko ewle û bêşîdet ameyê tîya.”
Egîtîm Sen’î badê hêrişanê ke Sêwregi û Mereşî de vera wendekaran û mamosteyan qewimîyayê, hemverê Wezaretê Perwerdeyî de “Nobeda Cuye” dabî destpêkerdene, roja 3. de dewam kena. Nobeda ke hetê kedkaranê perwerdeyê ra amebî destpêkerdene, bi beşdarbîyayîşê wendekaranê lîse û unîversîte, xeylê endamanê partîyanî sîyasî û rêxistinanê komelkî beşdar bîyî.
Serekê Pêroyî yê Egîtîm Sen’î Kemal Irmak eşkerayîya cayê nobedê de qal kerd û nê çî vatê: “Kesê ke qesra xo de roniştê goşê xo waştişanê şarî rê padayê, mumkin nîyo ke ma bieşnawê. Tîya de xeylê temsîlkarê perwerdeyê est ê, gede, keye hîs û waştişî pêrine hempar ê. Waştişê ma zelal o; ma seba waştişanê xo yê seba perwerdeyêko ewle û bêşîdet ameyê tîya. Wezîr heme çî budçeya wendegehan rê verdeno. Heke wendegeh taxêka zengîn de bo bi paştîdayîşê keyeyan eşkeno dêsan berz bikero û wezîfedarêk verê berî de ca bikero. Helbet nê çî muhîm ê. La ganî polîtîkaya wezaretî heme wendegehan de bêrê caardiş.”
