Şubeyê EGÎTÎM SEN’î yê Amedî eşkera kerd ke muracatanê musabeqaya hîkayeyan ê Abdullah Duranî ya 15. dest pêkerd. Musabeqa do bi dîyalektanê kurmanckî û kirmanckî yê Kurdkî û tirkî bêro viraştene. Amancê musabeqa, vîrardişê Abdullah Duran o ke 9 serre bi û amebi kiştene, vîrê komelî de bigrê.
Şubeyê EGÎTÎM SEN’î yê Amedî, seba vîradişê Abdullah Duranî yo ke serra 2006î de Amed de 9 serrîya xo de cuya xo ra bibi, her serre musabeqaya hîkayeyan virazena. Şubeyê EGÎTÎM SEN’î bi eşkerayîyêka nuştekî dîyar kerd ke muracatanê musabeqaya hîkayeyan ê 15. yan zî musabeqaya emserî dest pêkerd.
Do bi 2 ziwanan bo
Musabeqaya ke 15 serrî bêmaben yena viraştene, muracatî seba hîkayeyanê orîjînal ê bi dîyalektanê kurmanckî û kirmanckî yê kurdkî û tirkî ameyê, yenê qebulkerdene. Eşkerayîye de ame dîyakerdiş ke na musabeqa piştîdayîşî dana edebîyato zafziwanin û nuştoxanê neweyan teşwîq kena. Sewbîna ame dîyakerdiş ke taybetî nuştox, mamoste, xebatkarê perwerdeyî û heme kesî ke warê edebîyatê gedeyan û hîkayeyan de eser danê, eşkenê beşdarê musabeqaye bibê.
Xelat û tarîxê musabeqa ame dîyarkerdiş
Eşkerayîye de ame îfadekerdiş ke roja peyên ê muracatan sey 31ê teşrîna peyêna 2026î ameya dîyarkerdene û wina vat: “Netîceyê musabeqa do 27ê adara 2027î de bêro eşkerakerdiş û merasimê xelatdayîşî zî do 27ê adara 2027î de, Amed de bêro dayîş. Netîceyê, erjnayîşê komîteya musabeqaye de, do seba xelata yewine 25.000 TL, seba xelata dîyine 20.000 tl û seba xelata hîrêyine zî 15.000 TL bêro dayîş.”
Seba nuştoxan vengdayîş ame kerdene
Şubeyê EGÎTÎM SEN’î peynîya eşkerayî de de vengdayîşê nuştox û beşdaran kerd û wina ame vatiş: “Nameyê Abdullah Duranî tena nîşaneyê vindîbîyayîşî nîyo; eynî wextî de sembolê hêvîyê ameyoxîyo ke gede tede bê ters biciwîyê, ziwanê xo bi hawayêko azad qisey bikerê û hewnanê xo bi hawayêko azad bivînê. Nê semedî ra, muasabeqayê hîkayeyê ya Abdullah Duranî tena komelêko edebî nê; eynî wextî de vengdayîşêko hempar o ke cuye, aştî, zafziwanî û hêvîye paweno.”
