Ramazan Kiran piştî 33 salan, Mehmet Nûrî Tiryakî û Abdullah Çelîk jî piştî 30 salan hatin berdan. Ramazan Kiran ê li navçeya Dêrîkê hate pêşwazîkirin destnîşan kir ku gelê Kurd dê heta dawiyê ji bo azadiyê bixebite.
Berdana Ramazan Kiran û Mehmet Nûrî Tîryakî yên ku di Girtîgehên Tîpa T ên Hejmara 1 û 2yan ên Yozgatê de dihatin ragirtin, beriya niha bi hincetên cuda hatibû astengkirin. Ramazan Kiran piştî 33 salan Mehmet Nûrî Tiryakî piştî 30 salan duh hatin berdan. Her wiha Abdullah Çelîk jî duh ji Girtîgeha Tîpa T a Aksarayê piştî 30 salan hate berdan.
Ramazan Kiran ku piştî hatibû binçavkirin û girtin, bi îdiaya “Endamtiya rêxistinê” û hincetên din ên cuda cezayê muebbetê lê hatibû birîn. Ramazan Kiran, tevî ku cezayê lê hatibû birîn xelas kiribû jî, bi hinceta ku “poşman nebûye û ji rêxistinê veneqetiyaye”, berdana wî bi biryara Lijneya Îdare û Çavdêriyê ya Girtîgehê 4 caran hatibû astengkirin. Ramazan Kiran duh careke din derket pêşberî lijneyê. Lijneyê vê carê der barê Ramazan Kiran de biryara berdanê da.
Berdana Mehmet Nûrî Tiryakî jî beriya niha 9 mehan hatibû taloqkirin. Lijneya ji bo Mehmet Nûrî Tiryakî duh kom bû derbarê wî de biryara berdanê da. Piştî her du girtî hatin berdan li ber deriyê girtîgehê ji aliyê malbatên xwe û parêzerên Şaxa Komeleya Hiqûqnasên Ji Bo Azadiyê (OHD) ya Enqereyê ve hatin pêşwazîkirin.
Ramazan Kiran ê li vir axivî, wiha got: “Piştî 33 salan em ji girtîghê derketin. Tiştekî ez dûv û dirêj bibêjim nîne. Em hemû gelê xwe ser seran û çavan silav dikin û hembêz dikin.” Mehmet Nûrî Tiryakî jî wiha got: “Berxwedan jiyan e. Ez tenê vê bêjim bes e.”
‘Gelê me dê heta dawiyê ji bo azadiyê bixebite’
Dû re her du girtî bi malbatên xwe re ber bi bajarên xwe ve bi rê ketin. Ramazan Kiran ê ku îro di saetên serê sibê de hat Amedê, ji vir derbasî bajarê xwe navçeya Dêrîkê ya Mêrdînê bû. Ramazan Kiranê ku li vir bi awayekî bicoş hate pêşwazî kirin axaftineke kurt kir. Ramazan Kiran wiha got: “Ez we tevan bi dil û can silav dikim. Gelê me yê li her çar aliyê silav dikim. 33 sal bûn em ji hev qût bûn. Ji bo min weke ku ez nû ji dayik dibim e. Ez wisa hîs dikim. Ne li gorî demsalê bihar hatiye, me bihara azadiyê jî aniye. Divê her kes vê baş bizanibe. Gelê me dê heta dawiyê ji bo azadiyê bixebite.”
Piştî axaftinan girseyê li çepikan da û dirûşma “Bijî berxwedana zindanan” berz kir.
Abdullah Çelîk ji Girtîgeha Aksarayê hate berdan
Abdullah Çelîk jî ku li Girtîgeha Tîpa T a Aksarayê dihate ragirtin û beriya niha bi hincetên cuda berdana wî hatibû astengkirin hate berdan. Tevî ku Abdullah Çelîk cezayê lê hatibû birîn xelas kiribû jî Lijneya Çavdêrî û Îdareyê ya Girtîgehê bi hinceat ku “Poşman nîn e” berdana wî 3 caran asteng kiribû. Lijneya ku careke din ji bo Abdullah Çelîk kom bû derbarê wî de biryara berdanê da.
Abdullah Çelîk ji aliyê malbata xwe û endam û rêveberên DEM Partiyê ve hate pêşwazîkirin.
