Hemserekê Pêroyî yê DEM Partî Tuncer Bakirhan hêrişê serê hêzanê Pêşmergeyanê Herêma Kurdîstanî şermezar kerd û dîyar kerd ke do qebûl nêkerê ke kurdî bibê parçeyêk şêrê Herême.
Serê sibayî bi dron û fuzeyan herişê tabura 7 ê hêzanê 80î yê hêzanê Pêşmergeyanê Herêma Kurdîstanî ame kerdene. Hêriş sînorê Xelîfan yê serê Îdareyê Xoser yê Soranî yê şaristanê Hewlêrî qewimîya. Netîceyê hêrişan de 6 pêşmergeyî cuya xo ra bîyê û 45 Pêşmergeyî zî birîndar bîyê.
Hemserekê Pêroyî yê Partîya Têduştî û Demokrasî ya Şaran (DEM Partî) Tuncer Bakirhan derheqê nê hêrişî de eşkareyîyêk serê hesabê xo yê Xî de pare kerd û hêrişê serê Herêma Kurdîstanî şermezar kerd.
Ewro serê sibayî herêma ke girêdayê Hewlêrî yo, hêrîşêk vera yewîneyê Pêşmergeyan ame kerdene. Ez nê hêrişî bi huşk şermazar kena. Seba Pêşmergeyanê ke cuya xo ra bîyê, seba înan homayî ra rehmet wazena; şarê Herêma Kurdîstanî, Hukmatê Herêma Kurdîstanî û Keyeyê înan rê serweşîye wazena. Sewbîna zî seba Pêşmergeyanê birîndar ê zî waştena saxî selametî kena.
No hêriş parçeyê planêka hîraya yê ke amancê aye cografyaya Kurdîstanî bikero mîyanê şerêko herêmî. Verva nê hêrişanê lêminî helwestê ma hem hetê merdimî hem zî hetê sîyasî ra hewceyîya.
Ma qebûl nêkenê ke kurdî bibê parçeyêk şerê herême. Verva nê hêrişan ma do pêro pîya vinderê û têkoşînê xo yê hempar bi qerar bidomnê.
Zerrîya ma Hewlêr de ya; ma terba way û birayanê xo yê û ma do her tim kişta înan de bê.”
