KCK’yî mesajê xo de dîyar kerd ke kesayetanê sereke yê karê çapemenî û dîplomasîyê Ewropayî Osman Kiliç do her tim bi kesayetîya xo ya kedkare bêro vîrardene û Ehmed Huseynî zî berhemanê xo reyde do hemkarîyêka pîle karanê helbest û edebîyatî bikero.
Hemserekîya Konseya Rayber a KCK’yî seba wefatê rojnameger Osman Kiliç (Gundî) ke xeylê serrî yo Ewropa de karê dîplomasî û çapemenî kerdêne û nuştox-şaîr Ehmed Huseynî mesajê serweşîye pare kerd.
Mesajê KCK’yî wina yo:
‘Hîmanê bingeyin ê karê çapemenî ra yew bi’
“Hemrayê ma Gundî ke serra 1990î ra Ewropa de mîyanê têkoşînê azadîye yê şarê kurd de bi, nêweşîya ke demêko derg girewtbî, rîyê aye ra şehîd bi. Wa sereyê şarê ma û keyeyê ey weş bo. Hemrayê ma Gundî (Osman Kiliç) do Kurdîstana azade û demokratîke de her tim bêro vîrardene.
Hemrayê ma Gundî serranê derg û dila karê dîplomasî rayra berd. Dima ra beşdarê karanê çapemenîbi xeylê sazgehanê çapemenî de daraxê berpirsîyarî de xebitîya. Tewr peyên ANF de wezîfeyê dîrektorîye kerdêne.
Keyeyêko welatperwer ê Sêrtî ra bi. Kênaya no keyeyo welatperwer ke, pîyê aye mele bi, Newroz (Melahat Hîdayet Kiliç) serra 1993î de koyanê azadan de şehîd bîye. Hemrayê ma Gundî roja ke tewrê xebatan bi aye ra dima çi wezîfe ey rê ameye dayene, ey ard ca. Bi desan serran kesayetê xo yê zerrîşenikî reyde cehd kerd ke her wezîfeyî bîyaro ca. Ewropa de bi hîmanê esasî yê karanê çapemenî û dîplomasî.
Hemrayê ma Gundî rixmo ke nêweşîyêka girane girewtbî zî heta rojanê xo pêyen zî karê xo kerd. Sozdarîya xo ya bi xeta Rayber Apo û Têgêrayîşê Azadîye gamanê tewr zehmetan de zî dewam kerd û bi wayîrê vindertişêko nimûne. Hemrayê ma Gundî ke kedkaranê nimûne ê têkoşînê azadîye ra yew bi, do her tim bi na taybetmendîya xo bêro vîrardene. Kurdîstana azade û Rojhelatê Mîyanên o demokratîk ke hesreta ey de bi, do teqez bêrê ca.
Kurdîstano azad do hîsanê şaîran awan bibo
Şaîr, edebîyatkar û roşnvîro kurd o erjaye Ehmed Huseynî zî şi heqîya xo. Wa sereyê keyeyê ey, cematê huner û edebîyatî û pêroyê şarê Kurdîstanî weş bo. Hunermend, edebîyatkar û roşnvîrî ruhê komelî ye. Aktoranê bingeyîn ê ke şar û komelê pawenê û resnenê ameyoxî.
Ehmed Huseynî zî bi şîîranê xo afirnayîşê ruh û hisanê şarê kurdî de kedêka pîle daye. Welatperwerîya ey a xurte, heskerdişê ey o welat û şarê xo şîîranê xo de mojna. Têkoşînê azadîye yê şarê kurdî nêzdî ra taqîb kerdêne û hîs kerdêne. Şewatê sînema yê Amûdê şîîranê Ehmed Huseynî de gulbang da û resna azanê neweyan.
Ehmed Huseynî ke şaîrêko weçînite yê tradîsyonê şaîran ê Amûdî ra bi, şaristanê Amedî yê Vakurê Kurdîstanî de zî mend. Demo ke Amed de bi, şorişê demokratîk û bedilîyayîşê mîyanê komelî yê Vakurê Kurdîstanî zî nêzdî ra dî. Ney hem kesayetê ey ser o hem zî şîîranê ey ser o tesîr kerd. Şorişê Rojava zî dî uca de hemkarîye karanê edebîyatî rê kerd.
Ehmed Huseynî xeylê serran mîyanê tradîsyonê çapemenîya azade de MED TV, Medya TV, ROJ TV, Çira TV, Ronahî TV, Mezopotamya TV’yî de programê edebîyat û şîîran amade kerd.
Ehmed Huseynî hemkarîyêka muhîme ziwanê Kurdkî rê kerd ke ci rê asîmîlîsayon yeno ferzkerdene. Berhemê ke afirnayî do hemkarîyêka pîle karê şaîr û edebîyatkaran rê bikerê. Ma bawer kenê ke şaîrê Rojava û pêroyê Kurdîstanî do karanê ey bimana bikerê. Kurdîstano azade û demokratîk ke o hesreta ey de bi, bi ruh û hîsanê ke şaîr afirnenê do teqez bêro ca.”
