Cinîyê Amedî yê ke beşdarê mîtîngê 8ê Adare bîyê dîyar kerd ke ê sipasîya Rayberê Şarê Kurdî kenê û no têkoşînê înan seba azadîye yo û vat: “Fikrê Rayberê Şarê Kurdî asoyê cinîyan hîra keno û seba cinîyan benê hêz. Her ca de koletî est a la vera aye têkoşînê ma zî est o. Ma bawer kenê ke do na koletî bişiknê û azadîya cinîyanê kurd teqez bikerê.”
Bi pêşengîya Têgêrayîşê Cinîyanê Azadan (TJA) û Meclîsê Cinîyan ê DEM Partî bi sloganê “Ma xoverdayîşî reyde azade benê, komelê demokratîkî awan kenê” Meydanê Îstasyonî de mîtîng ame kerdene. Bi hezaran cinî bi coş û heyecanêko pîl 8ê Adare Roja Cinîyan a Dinya pîroz kerd û mesajê aştî, têduştî û piştgirîya cinîyan da. Cinîyê ke beşdarê mîtîngî bîyê his û mesajê xo ajansê ma rê îfade kerdê.
‘No têkoşîn û proses seba azadîye yo’
Cinîyê ke beşdarê mîtîngî bîyê îfade kerd ke ê nêwazenê cinî bimrê, wa cinî bi hewayêko azade biciwîyê û wina vat: “Ma namusê kesekî nîyê. Senî ke Homayî camêrdî afernayê, wina zî cinî afernayê. Heqê înan çi bibê, ê ma zî ê yê. Ma wazenê her tim aştî û serkewtiş est bo. No têkoşîn û proses seba azadîye yo. Her ca de koletî est a la vera ney têkoşînê ma zî est o. Ma bawer kenê ke na koletî binfînê û azadîya cinîyanê kurd teqez bikerê.”
‘Wa cinî hêz û fikranê xo bi azadîye bişuxulnê’
Cinîyan dîyar kerd ke ewro roja cinîyan a û ê do teqez serkewê û ê êdî nêwazenê dayîkî bi dejî biciwîyê: “Ma aştî û têduştîye wazenê, ma şer nêwazenê. Ma nêwazenê tu çîyêko xirab biqewimîyo. Ma vanê êdî bes o, ma êdî nêeşkenê dej biancê. Ma vanê wa çîyêk nêbo ciwananê ma, wa dayîkê ma êdî dej nêancê. Wa berê hepisxane û zindanan, berê ko Û çolan abî.”
‘Fikrê birêz Ocalanî asoyê cinîyan hîra kenê û seba cinîyan beno hêz’
Cinîyan da zanayene ke înan qade de mesajê Rayberê Şarê Kurdî Abdullah Ocalanîbi heyecanêko gird pêşwazî kerdo û wina vat: “Ma aştî wazenê û înşelah do rojê hîna weşî vernîya ma de bibê. 8ê Adare xoverdayîş o, cuye; cinî, cuye, azadîye yo. Şarê kurdî serkewto û binnêkeweno. Ewro na qade de mesajê birêz Ocalanî ame wendene û silamê ey est bîyê. Seba mesajê ey ma sipasîya ey kenê. Fikrê birêz Ocalanî asoyê cinîyan hîra kenê û seba cinîyan beno hêz.”
