Endamê Konseya Rayraberdîşî yê KCK’yî Zubeyîr Aydarî derheqê amadekerdişê qanûnê çarçewa de qisey kerd û vat: “Têkoşîna Azadîye pêşnîyazê xo hem pêşkêşê Rayberê Şarê Kurdî Abdullah Ocalanî kerdî hem zî dewlete rê erşawitî.”
Prosesê Aştî û Komelê Demokratîkî ke vakurê Kurdîstan û Tirkîya de rojevo sereke yo, ameyo merhaleyêka krîtîke. Heyetê Îmralîyî yê DEM Partî ke parlamenter Pervîn Buldan, Mîthat Sancar û avûkat Faîk Ozgur Erolî ra yeno pê, badê pêvînayîşanê heyetê AKP’yî û Serekê Pêroyî yê MHP’yî Devlet Bahçelî reyde, do 23yê temmuze roja panşeme seba pêvînayîşê Rayberê Şarê Kurdî Abdullah Ocalanî şêrê Girawa Îmralîyî. Heyet do nê pêvînayîşî de pêşnîyazê AKP’yî yê qanûnê çarçewa pêşkêşê Ocalanî bikero û fikranê ey bigêro. Hema eşkera nîyo ke heyet do halê nuştekî yê pêşnimûneyê qanûnî bero girawe yan nê.
Badê nê pêvînayîşî, yeno pawitiş ke qanûnê çarçewa partîyanê sîyasîyan rê bêro erşaawitiş û dima ra zî bêro rojevê meclîsî. Seba ke qanûn verê meclîs bikewo tehtîlî Komîteya Pêroyî ya Meclîsî ra bivejîyo, mabênê AKP û DEM Partî de mutabakat est o. Seba tedeyîya qanûnê çarçewa, hewteyêk ra ver mabênê DEM Partî, AKP û MHP’yî de muzakerê ameyî kerdiş. Yeno hêvîkerdiş ke pêvînayîşê Rayberê Şarê Kurdî Abdullah Ocalanî reyde êdî pêşnimûneyê qanûnî eşkera bibo û şarî reyde zî bêro parekerdiş. Seba nê zî pêvînayîşê nê hewteyî zaf tarîxî yo.
Endamê Konseya Rayraberdîşî yê KCK’yî Zubeyîr Aydarî, deheqê prosesê Aştî û Komelê Demokratîkî, statuyê şarî û Rayberê Şarê Kurdî Abdullah Ocalanî û amadekerdişê qanûnê çarçewa de ajansê ma re qisey kerd.
‘Ganî no qanûn bingeyê çareserî awan bikero’
Zubeyîr Aydarî îfade kerd ke qanûnê çarçewa ganî seba çareserîya meseleyê kurdî bingehêko xurt awan bikero û wina vat: “No qanûn ganî seba çareserîye rayîr bimojno. Meseleyê kurdî meselayêka seyan serran a û tena bi yew qanûnî çareser nêbena. Ganî qanûnê Tirkîya ke înkarê kurdan ser o ameyî viraştiş, bibedilîyê. Qedexeyê ziwan, kultur û nasnameyê kurdî ser o wirzê, zindanî veng bî û merdimî agêrê welat zî mesele çareser nêbena. Kurdî nêkewê mîyanê huhqûqî mesela çareser nêbena. Nê semedî ra zî ganî no qanûn bingeyê çareserî awan bikero.”
‘Çareserîya bêstatu û muzakere nêyena qebulkerdiş’
Zubeyîr Aydarî bal ant astengkerdişê pêvînayîşanê Rayberê Şarê Kurdî Abdullah Ocalanî reyde ser o û wina domna: “Serek Apo muzakerekerdoxo sereke yo û dewlete ey sey muxatab gêna. Labelê 2 aşmî yo ey reyde pêvînayîş nêbeno. Eger statuyê ey nêro garantîkerdiş, do senî çareserî biba? No qanûn ganî na babete zelal bikero. Seba çareserîyêka zerrî ta, ganî verê Serek Apo zî sey her kesî azad bo û bieşko pêro hetan reyde têkilî rono. Statuyê Rayber Apoyî gama yewin a; bê na gama yewine, ê bînî nêşinî çareser bibê.”
‘Ganî qanûn her kesî xo de bihewîno’
Zubeyîr Aydarî dîyar kerd ke Têkoşîna Azadîye pêşnîyazê xo Serek Apo û dewlete re pêşkêş kerdî û wina dewam kerd: “Pêşnimûneyê îqtîdarî nêresayo destê ma. Sey xebaranê kulîsî, vanî ke no qanûn do kategorîze bikero. No çî seba çareserîye nîyo. Ganî ma pîya mîyanê mutabakatî de bî; Serek Apo zî tede ganî tu kes zindanan de nêmano û kesê ke tewrê sîyasetê demokratîkî bîyê, ganî nêrê muhakemekerdiş. Mesela tena ronayîşê çekan nîya, ganî sebebê çekgirewtîşî orte ra bêrê wedaritiş. Eger qanûn goreyê mutabakatî nêvejîyo, beno qanûnê poşmanîye û tu averşîyayîşî nîano ca.”
Zîhnîyetê hemverî verê ma dano têkilîyanê cîyayan
Zubeyîr Aydarî dîyar kerd ke kaosê Rojhelatê Mîyanênî de, hewceyîya çareserîye hîna zêde bîya û wina vat: “Şerê Dinya yo 3. na herême de est o. Dewletê herêmî (Îraq, Sûrîye, Îran) mîyanê kaos de yê û Tirkîya zî bêçare ya ke biney bibedilîya. Hêzê mîyanneteweyî potansîyelê kurdan vînenî. Ma wazenî problemanê xo cîrananê xo reyde bi hawayêko têduşt çareser bikerî. Labelê eger zîhnîyete nêbedilîyo, ma bêçare manenê ke têkilîyanê cîyayan awan bikerî. Proses goreyê hedîseyanê herêmî dest pêkerd, labelê dewlete gaman nêerzena. Ganî îqtîdar destê xo lez bitepşo.”
‘Nê qonaxî de cigêrayîşê yewîya neteweyî esas o’
Zubeyîr Aydarî vat ke na qonaxe de yewîya neteweyî stratejîk a û qiseykerdişê xo wina qedîna: “Rojava de entegrasyon dewam keno, başûr de parlamento karê xo ser nîyo, vakur de zî prosesêk est o ke seba pêro parçeyan stratejîk o. Rojhelat de vera kurdan hêrişê çetinî est ê. Serkewtişê nê prosesî parçeyanê bînan ser o zî tesîr keno. Seba yewîye heyetî ameyî awankerdiş û ma do serrgêra Lozanî de verba parçekerdişê welatê xo de helwêst bimojnê. Çîyê ke heta nika gerîla kerdêne, nika ra pey ma do qadanê dîplomasî û çalakîyan de hîna zêde bikerî. Rayber Apo zî ney ser o vindeno û mesajan erşaweno.”
