Hayrettîn Adlig 33 serre yo, Dogan Yalçin zî 30 serre yo ke heps de yê. Malbatanê înan vat ke tevî ke hepsîyê înan cezaya xo temam kerda, berdayîşê înan yeno taloqkerdene û bi kerdişanê bêqanûnî hem hepsîyan hem malbatan ceza kenê.
Zindananê Kurdîstan û Tirkîya de xeylî wexto ke teda û kerdişê keyfî zêde benê. Hetê ra zî hepsîyê ke cezaya xo temam kenê, nêyenê berdayene û înfazê înan yenê veşnayene.
‘Hepisxaneyan ra cenazeyê hepsîyanê neweşan vejenê’
Birayê Dogan Yalçinî, Yaşar Yalçinî vat ke birayê ey 30 serre û 3 aşme yo ke heps de yo, labelê nêyeno berdayene. Dogan Êlih, Sêrt, Amed, Erzirom, Bolû, Kastamonû û Samsûn de mendo û nika Çorûm de yeno girewtene. Yalçinî vat ke nêzdîyê 4-5 serran o ke înfazê embazan yenê veşnayene û her ray çend aşman pey de erzenê. Ey vat ke hepsîyê neweşî estê û çend roje ra ver yew embaz ganê xo ra bî.
‘Înan ra poşmanî wazenê’
Yalçinî vat ke bi na kerdiş hem hepsîyayan hem malbatan ceza kenê û çûyîşê Çorûmî malbatan rê masrafêko giran o. Ey vat ke no nê exlaqî yo, nê zî huqûqî yo; waşt ke hema nika gamî bêrê eştene, qanûn bêrê vejîyayene û hepsîyayê neweşî bêrê berdayene. Ey vat ke gelek ray înan ra poşmanî wazenê.
‘Nika 34 serre yo ke heps de yo’
Birayê Hayrettîn Adligî, Îhsan Adligî vat ke birayê ey serra 1993î de ame destbendkerdene û aşmêk destbendkerdiş de îşkence dî. Hayrettîn Êlih, Amed, Dîlok, Sêwêreg, Bolû, Ordû, Gîrasûn û Çewlîg de mendo û nika Xarpêt de yeno girewtene. Adligî vat ke rêveberîya hepisxaneyî înan rê vanê “Dewlet ma yê”, ganî ci rê kitabî bêrê dayene labelê nêdanê, û pêvinayişanê keyeyan de probleman vejenê; çend ray nêverdayî ke keyeyî 5 deqe zî hetê înan de bimanê.
‘Birayê mi bîyo sey estewan û çermî’
Adligî vat ke birayê ey ra neweşîya anemî (kêmbîyayîşê gonî) esta, zaf zaîf bîyo, ganî 20 serre nayera ver bîyamêne verdayene. Îdareyê cezaevî poşmanîye danê verê hepsîyan. Înan çîyo ke poşman bibê nêkerdo. Îdareyê cezaevî bi keyfê xo înan veranêdano û terba înan ma keyeyan zî ceza keno. Îhsan Adligî waşt ke parlamenterî meclîs de Wezîrê Edaletî reyde hevdîtinan bikerê û yew çareserîye bivênê.










