Muhendîsê zîrekîya viraşta Ferhat Baysalî vat: “Modelê globalî sey Gemini, ChatGPT û Claude seba kêmanîya doneyanê kurdkî zafane agahîyanê xeletan danê. La Mazdek AI arşîvêkê taybetî yê kurdkî ser o ameyo perwerdekerdene ke bi seyan terabaytan ra virazîyeno.”
Ferhat Baysal Swîsre de ciwîyeno û nêzdîyê 25 serran o warê çîynermî, dîzayn û binawanîya teknolojîke de xebitîyeno. Baysalî seba kurdkî zaf aplîkasyonî viraştê; Awir zî înan ra yew o ke taybetî seba lehçeya kirmanckî ya.
Mazdek AI seba kirdaskî, soranî û kirmanckî ameyo viraştene û eşkeno 225 ziwanan ra zêdeyêr kurdkî rê açarnayîşan bikero. Platform veng keno nuşte, nuşte keno veng, vengê merdimî klon keno, tadayîşo zindî keno, belgeyan waneno û xeletîyanê rastnuştişî tesbît keno.
Baysalî vat ke kurdkî hetê teknîkî ra hema zî ziwanêko “kêmîçime” yo û panc astengê girdî est ê: cîyabîyayîşê alfabeyan, kêmanîya standardêkê rastnuştişî yê yewbîyayeyî, morfolojîya kurdkî ya dewlemende, têmîyankerdişê lehçeyan mîyanê doneyan de û arşîvê medyaya kurdkî ke bi serûberî nêameyê pawitene.
Baysalî vat ke seba ke kurdkî şorişê dîjîtalî de peyser nêmano, ganî çimeyê akerdeyî (open-source) zêde bibê, doneyê vengî bi hemkarîya komelî bêrê arêkerdene, Wîkîpedîya hîra bibo, kitabî dîjîtal bibê û vîdeoyê binnuşteyî yê kurdkî zêde bibê.
Baysalî vat ke o di serran ra zêdêr o Swîsre de tena no sîstem aver beno. Ey dîyar kerd ke o nika serê edîtorêkê vîdeoyî xebitîyeno ke do vîdeoyan ra biewnîyo, muhtewa fehm bikero û binnuşteyê kurdkî otomatîk tede zêde bikero.
Mazdek.AI www.mazdek.ai, Google Play û App Store ser o yeno ceribnayene.
