Dewa Kela ya qezaya Farqînî ya Amedî de ciwanê bi nameyê Mecnun Demîrî kanalê awe DSÎ’yî de xeniqîya.
Dewa Kela ya qezaya Farqînî ya Amedî de ciwanê bi nameyê Mecnun Demîr (20) seba ke xo honik bikero kewt kanalê awe yê Sazgehê Karanê Awa Dewlete (DSÎ). Mecnun Demîr o ke nêeşka xo bixelesno, awa kanale de xeniqîya. Agahdarkerdişê ekîbanê weşîye, leşkerî û binawe Mudirîyetê Îtfaîye yê Şaredarîya Amedî ya Şaristanê Girdî û Êlihî sewqê cayê hedîse ameyî kerdiş.
Netîceyê xebatanê cîgerayîşî de ke derûdorê çar seet û nêmî dewam kerd cenazaya Mecnun Demîrî ame vînayene. Ame zanayene ke cenaza çar-panc kîlometreyî awe reyde şîyo û dewa Hecî Brahîmî ê Farqînî de ame vînayene. Cenaza vernî de seba otopsîyî meşiya Nêweşxaneyê Dewlete yê Farqînî û uca ra zî sewqê Sazgehê Tibê Edlî yê Amedî ame kerdiş. Dimayê karûbaranê otopsîyî cenaza dewa Kela de ameye definkerdiş.
Ame zanayene ke Mecnun Demîrî dewe de şiwanîye kerdêne.
