Hêrişanê hewayî yê neweyan ê DYA de eyaletê Huzîstanî yê Îranî de tewr kêm 3 kesî merdê. Artêşê DYA dîyar kerd ke înan dayo 90 hedefanê eskerîyan ro. Mihafizanê Şorişî zî dîyar kerd ke înan hêrişê qerargehanê DYA yê Quweyt û Bahreynî kerdo.
Hêrişê Dewletanê Yewbîyayeyan ê Amerîka (DYA) û rejîmê Îranî yê vera yewbînan dewam kenê.
Goreyê Ajansê Xeberan ê Fermî yê Îranî IRNA’yî, hêrişê hewayî yê DYA de ke nêzdîyê şaristanê Ahvazî yê eyaletê Huzîstanî de ameybî kerdene, tewr kêm 3 kesî merdê, xeylê kesî zî birîndar bîyê.
Hetkarê Walîyê Huzîstanî Valîullah Hayatîyî dîyar kerd ke hêriş dormeyê Ahvazî de ameyo kerdene û merdeyî û birîndarî est ê.
CENTCOM: Ma da 90 hedefan ro
Fermandarîya Hêzanê Merkezîyan ê DYA (CENTCOM) dîyar kerd ke 8ê temmuze de vera 90 hedefanê eskerîyan ê Îranî operasyonêko newe kerdo.
Eşkerayîya CENTCOM’î de ame vatiş ke sîstemê pawitişê hewayî zî tede dayo binawanîya eskerî ro û ame vatene ke operasyon seba zeîfkerdişê kapasîteya hêrişî ya Îranî ya deryakaranê sîvîl û keştîyanê bazirganîye yê Neqebê Hurmuzî ser o ameyo kerdene.
Tehdîtanê Trumpî ra pey hêrişî vêş bîyê
Serekê DYA Donald Trumpî hişyarî daye ke eke Îran hêrişanê xo yê keştîyanê Neqebê Hurmuzî ser o bidomno, ê do operasyonê eskerî yê “hîna giranêr” bikerê.
Trumpî platformê medya dîjîtale Truth Socîal de eşkerayî daye û wina vat: “No çî cewabê vera bombardumanê vîzerî yê Îranî yê keştîyan ser o yo. Eke reyna bibo do encamê xo hîna giranêr bibê.”
Îran: Ma da qerargehanê DYA ro
Mihafizê Şorişî yê Îranî zî dîyar kerd ke sey cewabê vera hêrişanê DYA, înan dayo qerargehanê eskerîyan ê Amerîka yê Quweyt û Bahreynî ro.
Eşkerayîya de ke televîzyona dewlete IRIB’î de ameye weşanayene, ame îdiakerdene ke bi fuze û teyareyanê bêmerdiman dayo qerargehanê Arîfcan û Alî El Salem ê Quweytî û qerargehanê Cuffayr û Şêx Îsa yê Bahreynî ro.
Eşkerayî de sewbîna Amerîka ameye tehdîtkerdene ke eke aye hêrişanê neweyan bikera, ê do bidê qerargehanê Amerîka yê bînan ê herêmê ro.
Seferê trêne yê Tehran û Meşhedî ameyî vindarnayene
Televîzyona dewlete ya Îranî dîyar kerd ke badê hêrişanê DYA seferê trêne yê Tehran û Meşhedî ameyî vindarnayene.
Fransa veng da qedînayîşê hêrişan
Wezîrê Karanê Teberî yê Fransa Jean-Noel-Barrotî veng da ke Îran û DYA hêrişanê “cewabdayîşî” vindarnê.
Tehran: Neqebê Hurmuzî tena bi şertanê Îranî do bêro akerdene
Muzakerekarê sereke yê Îranî Muhammed Bakir Galibafîyî dîyar kerd ke Neqebê Hurmuzî tena bi şertanê ke hetê Îranî ra bêrê dîyarkerdene, eşkeno reyna bêro akerdene.
Galibafî dîyar kerd ke polîtîkaya tehdît û teda ya DYA do bêencam bimana.
