Hemserekê Pêroyî yê Verên yê HDP’yî, Selahattîn Demîrtaşî pîy û birayê Narîn Guran reyde pêvînayîş kerd û veng da sazgeh û dezgehanê huqûqî kerd ke seba edalet bêro caardene mîyanê hewildayîşî de bibê.
Hemserekê Pêroyî yê Verên yê HDP’yî, Selahattîn Demîrtaş ke Hepîsxaneyê Tîpê F’yî yê Edîrne de yo, pîy û birayê Narîn Guran, Arîf Guran û Baran Guranî de pêvînayîş kerd û derheqê pêvînayîşî de hesabê xo yê dîjîtalî yê X’î ser o eşkerayîyêk vila kerd.
Selahattîn Demîrtaşî eşkerayîya xo de dîyar kerd ke ey dosyaya Narîn Gurane ser o sey huqûqnasêk cigêrayîş kerdo û vat: “Dosya de o ke sucê ey bi delîlan ameyo ispatkerdene tena Nevzat Bahtîyar o. Dosya de maya Narîn Guran, Yuksel Guran, datê aye Salîm Guran û birayê aye Enes Guran zî ameyo girewtene. No çî bobelatê huqûqî yo. Dîyar o ke mehkema binê tesîrê agahîyan de menda ke çapemenîye de vila bîyê, la goreyê huqûqî seba cezakerdiş ganî delîl û îspatî bibê. Nê semedî ra ganî kontrolê îstînaf û Mehkemeya Berze de na ceza bêra betalkerdene. Sere de ez veng dana Baroyê Amedî û heme sazgeh û dezgehanê huqûqî ke seba edalet bêro caardene, mîyanê hewildayîşî de bibê. Ez Wezaretê Edaletî ra zî rîca kena ke na dosya ser o bi hawayêko biserûber cigêrayîş bikero û waştişê betalkerdişî Mehkemeya Berze rê bikero.”
