Rejîmê Îranî no şefeq zêdeyî 5 dron û fuzeyan reyde hêrişê sînorê Hewlêr û kampanê partîyanê Rojhelatê Kurdîstanî yê Silêmanî kerd. Sewbîna vengê teqayîşan sînorê Helebçe ra ame eşnawitene.
Hêrişê di hetî yê mabênê Amerîka û Îranî de ke dest pêkerdê, dewam kenê. Vera hêrişanê Amerîka, Îran hêrişê welatanê Kendawe û Herêma Kurdîstanî keno.
Goreyê RojNewsî; ewro serê sibayî, zêdeyî 5 drone û fuzeyan reyde hêrişê sînorê Hewlêrî ame kerdene la hêriş hetê sîstemê pawitişê hewayî ra ameyî vindarnayîş.
Heta nika tu zîyanêkê madî û canî nêameyo eşkerakerdene.
Goreyê agahîyan, saetenê nê serê sibayî de vengê teqîyayîşan sînorê şaristanê Helebçe ra ame eşnawitene. Sebebê ey bi fermî nêame eşkerakerdene, la yeno vatene ke hêriş bi drone ameyo kerdiş.
Sewbîna ame zanayene ke nê serê sibayî zî bi dronan hêrişê partîyanê kurdan ê Rojhelatê Kurdîstanî yê sînorê Rizguwêz ê Silêmanî ame kerdene û şewat vejîya. Ame eşkerakerdene ke serê sînorê Helebçe de zî vengê teqayîşan ame eşnawitene. Goreyê çimeyanê hêremî hêrişê rejîmê Îranî nê saetan de vera kampanê partîyanê kurdan dewam kenê.
Derheqê zîyanê madî û canî de tu agahî nêameyê vilakerdene.
