Wan – Rojnamegerî metodê têkoşînî ra yew o ke nêverdeno heqîqetî, raştî, roşnî tarîye de bimanê. Heto bîn ra zî metodê rêxistinkerdene û vilakerdena heqîqetî yo. Çapemenîya azade de no prensîb bi bedêlanê giranan heta nika ameyo dewamkerdene. Ayfer Serçe zî nê rojnamegeran yewa ke nê prensîbî xo rê sey metodê bingeyê karî û cuya xo qebul kerd û no rayîr de tewrê karwananê bêmergan bîye.
Rojnamegerî tena karêk nîyo, metodêkê têkoşînê heqîqetî, xonaskerdiş û azadîye yo. Rojnamegerî her wext şopdarîyê raştî keno, fedekarî û tehlukeyanê girdan dano ver çiman û lazimîyêke yo. Rojnamegerî metodê têkoşînî ra yew o ke nêverdeno heqîqetê, raştî û roşnî tarîye de bimanê. Heto bîn ra zî metodêkê rêxistinkerdene û vilakerdena heqîqetî yo. Çapemenîya azade de no prensîb bi bedêlanê giranan heta nika ameyo dewamkerdene. Ayfer Serçe zî nê rojnamegeran yewa ke nê prensîbî xo rê sey metodê bingeyê karî û cuya xo qebul kerd û no rayîr de tewrê karwananê bêmergan bîye.
“Cigîrayîşê raştîye zehmet o; nuştişê ey zî cesaret wazeno. Çarenusê rojnamegerekî/e no yo ke her dîyan zî eynî demî de bigîro milê xo ser.” Wexto ke merdim na cumle ra ewnîyeno, bengînê Ayfer Serçe yo seba rojnamegerî ano vîrê merdimî. Yew zî cigêrayîşê heqîqetî ke goreyê na raştîye hetanî peynîya emrê xo têgêraya zî Ayfer Serçe bî.
Ayfer Serçe serra 1974î de qezaya Wêranşarî ya Riha maya xo ra bîya. Serranê lîsede radyoyê bi nameyê Karacadag de sey pêşkêşkar xebetîyaya. Dima ra seba dersxaneyî şina Adana û Mersîn; badê dersxaneyî beşêko di serre yê unîversîte qezenç kena, la wexto ke seba qeydkerdişî şina, vînena ke uca seba wendişî destdaye nîyo, dima ra fek qeydkerdişî ra veradana û agêrena.
Dima ra derbasê beşê Fakulteya Karnasî ya Unîversîteya Çukurovayî bena. Ayfer serçe badê di serranê wendişê unîversîte, serra 1998î de tewrê têkoşînê cinîyanê kurdan bena.
Raywanîya Rojnamegerîye
Raywanîya Ayfer Serçe ya rojnamegerî, destpêkê serranê 2000î de, Ajansê Xeberan ê Mezopotamyaye (MHA) de dest pêkerd. Badê ke serra 2005î de MHA’yî bi destê dewlete ame girewtene, eynî serre de bîye muhabîrê Ermenîstanî ya Ajansê Xeberan ê Firatî (ANF). Hîrê serrî Ermenîstan de mend û dima ra derbasê Herêmê Kurdîstanî ya Federal bîye.
Ayfer Serçe zaf waştêni ke ajansêke tena aîdê cinîyan a, bibo. No waştiş û xeyalê Ayfer Serçe 8ê adara 2012î de bi akerdişê JINHA’yî bi ca ame. Şopdar û hemrayîrê aye nika bi JIN NEWS, JIN TV, NÛJINHA, NEWAYA JIN têkoşînê aye ya vera serdestîyê hişmendîya patrîarkal domnenê.
Xoverdayîşê seba cinîyan
Dima seba cigêrayîşê xokiştişê cinîyan ê ke şaristananê sey Urmîye û Mehabadî yê Rojhelatê Kurdîstanê zêde bîbî, derbasî ê şaristanan bîyê.
Qetilkerdiş û cenazeyê aye
Ayfer Serçe, badê xebatêka 3 hewteyan ê xokiştişê cinîyan ser o, mabênê 19 û 23 temmuza 2006î de dorûverê Kelareşî ya sînorê Tirkiye-Îranî ser o ya de pusuyê artêşê Îranî de ame qetilkerdiş.
Rêxistinê heqê medriman, rêxistinê rojnmegeran û keyeyê Ayfer Serçe waşt ke cenazeyê aye Îran ra bêro girewtiş û bîyarê Wêranşar; la rayedaranê Îranî cenaze nêda û sewbîna derheqê qetilkerdişê aye de heta nika tu eşkerayîyêka fermî zî nêda.
