Platformê Yewîya Cinîyanê Kurdan sînorê Rojhelatê Kurdîstanî ser o hêrişanê rejîmê Îranî yê vera başûr û rojhelatî şermezar kerdî û wina vat: “Dişmenê şarê kurdî, hêzê xo yo tewr pîl bêtifaqî û letebîyayîşê şarê kurdî ra gêne. Ma bawer kenî ke çareserîya tekane ya vera polîtîkayanê serdestan; yewîye û piştgîrîya şarê kurdî ya.”
Platformê Yewîya Cinîyanê Kurdan seba protestokerdişê hêrişanê rejîmê Îranî yê vera cayanê Herêma Kurdîstanî, serê sînorê rojhelatî yê qezaya Seravî ya Wanî de çalakî viraşt. Cinîyî nêzdîyê Berê Sînorî yê Kapikoyî de peya bîyî û bi sloganan heta berî rayra şîyî û uca de eşkerayî daye.
Raybera Înîsîyatîfê Yewîya Kurdan û endama platformî Dîba Keskîn ke eşkerayî ra ver qisey kerd, hêrişê Îranî şermezar kerdî û dîyar kerd ke cinîyî do têkoşînê xo ya vera na rewşe xurt bikerê.
‘Rixmê şerê DYA û Îsraîlî zî kiştişê kurdan ra fek veranêdanê’
Dimayê aye Verfeka Platformê Yewîya Cinîyanê Kurdan Laleş Bîçîmlî metnê eşkerayî wend û dîyar kerd ke rejîmê faşîst ê Îranî bi serran o bi hawayêko hovane kurdanê rojhelatê Kurdîstanî darde keno û qetil keno. Laleş Bîçîmlî ard ziwan ke polîtîkayê nê rejîmî yê qirkerî tena aîdê nê serdemî nîyê û vat: “Roja ke Kurdîstan mîyanê çar dewletan de ameyo barekerdiş, a roje ra heta ewro, bi hovîtîyeka pîle teda, zilm û qirkerdiş serê şarê kurdî de rayra beno. Rixmo ewro Îran hetê DYA û Îsrailî ra yeno bombabarankerdiş û binê hêrişan de yo zî, dişmenî û kiştişê kurdan ra fek veranêdano.”
‘Bi desan merdimî qetil kerdî’
Laleş Bîçîmlî da zanayene ke Îranî verê xo dayo başûrê Kurdîstanî û hêrişanê hovaneyan keno û wina dewam kerd: “Nê çend aşmanê peyênan de bi desan reyî hêriş kerd û bi desan merdimî qetil kerdî. Nê rojanê peyênan de Silêmanî û Hewlêr de kampê partîyanê kurdanê Rojhelatê Kurdîstanî kerdê hedef û bi dron û fuzeyanê balîstîkan hêrişan kenî. Tewr peyên vera Komeleya Şorişgirî ya Zehmetkêşan a Rojhelatê Kurdîstanî hêriş ame kerdiş. Netîceyê nê hêrişî de heşt pêşmergeyê Komeleyî şehîd bîyê.”
Vengdayîşê seba bêvengnêmendişî
Dewamê qiseykerdişê xo de Laleş Bîçîmlî dîyar kerd ke vera rejîmê faşîstî, yewîya şeş partîyanê Rojhelatê Kurdîstanî mîyanê şarê Kurdanê Rojhelatî de hêvî û bawerîyêka xurte awan kerda û qiseykerdişê xo wina domna: “Ma zî sey cinîyanê vakurê Kurdîstanî, tîya ra veng danî pêro dinya û şaran ke vera nê polîtîkayanê Îranî yê lêmin û hovaneyan bêveng nêmanê û şarê kurdî tena nêverdê. Eynî wextî de ma veng danî cinîyanê kurd û pêro şarê kurdî ke vera nê hêriş û dardekerdişanê rejîmê Îranî yê faşîstî, yewîye û tifaqê xo xurt bikerê.”
‘Çareserî tifaq û yewî ya’
Laleş Bîçîmlî bal ant bêtifaqîya şarê kurdî ser o û qiseykerdişê xo wina qedêna: “Eşkera yo ke dişmenê şarê kurdî, hêzê xo yê tewr pîl bêtifaqî û letebîyayîşê şarê kurdî ra gênk. Ma vînênî ke vera pêro polîtîkayanê serdestan ê kurdan, çareserî tifaq û yewîya şarê kurdî ya. Ma reyna pêro hêriş, qirkerdiş û çinhesibnayîşê serdestan ê serê şarê kurdî bi hawayêko huşk şermezar kenî û vanî, bilez nê polîtîkayanê xo yê qlêmin û qirkeran ra fek veradê.”
Eşkerayî bi vatişê sloganê, “Yek e yek e yek e gelê Kurd yek e” qedîyaye.
