Ame îdîakerdene ke qezaya Dêrxasê Mûşî de qoricîyo bi nameyê E.G. 14 serrî ra ver tecawizê kesa astengdare E.K. kerdo. Maya E.K. Fatma K. ke derheqê ci de Serdozgerîya Komarî ya Mûşî de gerre kerd, vat ke lajê aye E.K. bi qûndaxê çekî zî ameyo pirodayene.
Goreyê îdîa, 14 serran ra ver bajarokê Migrakomê Dêrxasî de qoricî E.G. tecawizê E.K. kerdo. Wexto ke keyeyî bi na hêrişe hesîya, birayê E.K. R.K. seba heyfgirewtişê birayê xo E.G. remnayo. La E.G. remnayîş sey “çalakîyêka rêxistine ya PKKyî” ya vera xo mojnayo û R.K. rê cezaya hepsê 18 serran ameya birnayene; R.K. a game ra nat hepisxane de yo.
Fatma K. ke ajansê ma rê qisey kerd, vat ke lajê aye astengdar o û hişê ey sey hişê gedeyêkê di serran o. Aye vat ke rojêk gorê şêxî ser o lajê xo E. û E.G. dîyî, çimê lajê aye pirrê gonî bîyî û lajê aye vat: “E.G. ez eşta wesayîta xo, ez arda tîya û waşt tacîzê mi bikero.” Fatma K. ard ziwan ke seba ke hende serrî gerre nêkerdo, wîjdanê aye rehet nîyo.
Badê gerreyî qoricî dayo E.K. ro
Fatma K. vat ke nêzdîyê aşm û nême ra ver aye E.G. ra vato ke do gerreyê ey bikero. Badê ney E.G. lajê aye E.K. bi qûndaxê çekî dayo piro û tersnayo ke derheqê ey de îfade nêdo. Peyê pirodayîşî sereyê E.K. de girikêk virazîyayo, o nêweş kewto û 28ê temmuze 2026î de Nêweşxaneyê Dewlete yê Mûşî de ameyo emelîyatkerdene. Fatma K. vat ke lajê aye badê emelîyatî wina vato: “E.G. ez berda Dêrxas, kes çin bî, çeka xo pişta xo ra vete û da sereyê mi ro. Vat eke ti îfade bidî ez do to bikişa.”
Fatma K. hem seba tecawizî hem zî seba pirodayîşî Fermandarîya Cendirmeyan a Dêrxasî û Serdozgerîya Komarî ya Mûşî de gerre kerd û seba her di serebûdan dosyeyê cîyayî ameyî amadekerdene. La goreyê malumatê ke ma avûkatan ra girewtî, Serdozgerîya Komare ya Mûşî derheqê dosyeya pirodayîşî de qerarê taqîbnêkerdişî dayo. Dewaya tecawizî dewam kena, la yeno pawitene ke seba çinbîyayîşê delîlan na dosye de zî qerarê taqîbnêkerdişî bêro dayene.
