Fermandarê Pêroyî yê HSD’yî Mazlûm Ebdî hêrişê Îranî yê vera kampê komeleya Zehmetkeşan a Silêmanî şermezar kerd û mesajê serweşîye da keyeyanê 9 pêşmergeyanê ke şehîd kewtî bî.
Artêşa Pasdaran a Îranî 17ê temmuze de bi fuzeyan hêrişî kampê Komeleya Zehmetkêşan a sînorê şaristanê Silêmanî kerdbî û netîce de 9 pêşmergeyî cuya xo ra bîyî û hinî pêşmergeyî zî birîndar bîbî.
Fermandarê Pêroyî yê Hêzanê Sûriya Demokratîk (HSD) Mazlûm Ebdî serê hesabê xwe yê Xî de mesajêk vila kerd, hêriş şermezar kerd û keyeyanê 9 pêşmergeyanê şehîdan rê serweşîye waşte
Mazlum Ebdî no mesaj vila kerd: “Bi xemgînîyêka girde ma agahîya şehadetê 9 pêşmergeyanê Komeleya Şorişgêran yê Zehmetkêşan yê şaristanê Silêmanî de netîceyê hêrişê rejîmê Îranî de demê ke pêşmergeyî gureyê xo kerdêne, eşnawit. Ma reyna her hêrişêko ewleyî û aramîya Herêma Kurdîstanî kenê hedef şermezar kenê. Ma serweşîye heme keyeyanê şehîdan, rayberîya Komeleya Şorişgêran û şarê ma yê kurdî yê Rojhelatê Kurdîstanî rê wazenê. Homa şehîdan bi rehma xo şa bikero û birîndaran rê zî şîfaya bilez wazenê.”
