Maya di şehîdan Cemîle Acar Elver wazena ke cenazeya lajê xo Mevlût Elverî (Azad Tolhildan) Goristanê Bêkesan ê Wanî ra bigîro û goristanê taxe de defn bikero. Cemîle Acar seba cenazeya lajê xo muracatê dozgerîye kerd.
Maya şehîdanê Têgêrayîşê Azadîye Mevlût Elver (Azad Tolhildan) û Adem Elverî (Dilgeş Azad) Cemîle Acar Elver wazena ke cenazeya Mevlût Elverî Goristanê Bêkesan ê Wanî ra bigîro û bero goristanê şehîdan. Mevlût Elver 21ê tebaxa 2017î de Wan de pêkewtişêk de şehîd bîbî û cenazeya ey a serre ra nata uca de ya.
Cemîle Acar dîyar kerd ke bi serranê dergan keye û domanê aye zordarî ciwîyayî: “Ma dişmenî ra zaf zulm dî; 20 serran de nêzdîyê 20 reyan eşt keyeyê ma ser o. Lajê mi çîyê herînayîşî rotêne; dişmenî ey ra vatêne ‘Kurdkî qisey meke û Rayberî rê heqaret bike, ma do çîyanê to bigîrê û zêde pereyan bidê to.’ Ey qebul nêkerdêne, a game înan heqaret kerdêne û o kutêne.”
Cemîle Acar vat ke polîsan domanê aye rayîrê karî de vindarnayêne û kutêne: “Rojêk sereyê lajê mi masaybî, rojêk zî linga ey bi kutişî masaybî bîbî. Polîsan domanan ra vatêne ‘Kurdkî qisey bikerê’, dima zî înan kutêne. Domanan zî vatêne ‘Şima vanê Kurdkî qisey bikerê, dima zî ma kuwenê çunke ma Kurdkî qisey kenê.'”
Cemîle Acar dîyar kerd ke lajê aye 9 serrî yo Goristanê Bêkesan ê Wanî de yo û aye vizêrî muracatê dozgerîye kerdo ke cenazeya ey bigîro.
Cemîle Acar Prosesê Haştîye û Komelê Demokratîkî ra zî waştişê xo wina ard ziwan: “Waştişê ma nasname û ziwanê ma yo. Ez 9 serrî yo paweyê esteyanê lajê xo ya; ez nêvana ez do lajê xo defn bika, ez vana ez do veyveyê ey bikera. Ma wazenê ke dayîkê kesî nêbermê û gonî nêrişo êdî; ma haştî wazenê.”
