Verfekê Meclisê Asayîşê Neteweyî û Polîtîkayanê Teberî yê Îranî Îbrahîm Azîzî bal ant hewcedarîyanê asayîş û averşîyayîşî ser û eşkera kerd ke ê do keştiyê ke Neqebê Hurmûzî ra ravêrenê ra pere bigîrê.
Krîzê mabênê Dewletanê Yewbîyayanê Amerîka û Îranî bi ambargoyan û tehdîdan dewam kenê. Şer û pêkewtiş vîyartişê keştîyan yê Neqebê Hurmûzî ardo verê astê vindertişî. Goreyê xeberêka Ajansê Xeberan yê Tasnîmî, Îranî qerar dayo ke ê do nika ra dima keştîyê ke Neqebê Hurmuzî ra ravêrenê pere bigîrê.
‘Do fikrê pispor û sazgehan bêrê girewtene’
Verfekê Meclîsê Asayîşê Neteweyî û Polîtîkayanê Teberî yê Îranî Îbrahîm Azîzî da zanayene ke na pêşnîyaze hema merhaleyê cigêrayîşî de ya û dîyar kerd ke ê do derheqê babete de fikrê pisporan û sazgehanê elaqadaran yê dewlete zî bigîrê.
‘Do demderg bo’
Îbrahîm Azîzî vat ke ê do nê qerarî seba menfeetanê neteweyî û asayîşê Îranî bigîrê. Reyna Îbrahîm Azîzî vat ke ê na kerdene ne seba demkî, do sey domdarî aver berê.
‘DYA nêeşkêna xo ferz bikera’
Îbrahîm Azîzî tewr peyên vera eşkerakerdişanê rayedaranê DYA reaksîyon nîşan da û ard ziwan ke DYA vera Îranî heme îmkanê xo şuxulnayê, kewta ‘tengasîyêka stratejîke’ û nêeşkêna waştişanê xo Îranî ser o ferz bikera. Îbrahîm Azîzî, şerê 40 serre ke dewam kerdo vist vîr û dîyar kerd ke ganî Washington’ hemsencîya herêmî bigîro verê çiman, nêeşkena şertanê xo vera Îranî ke herême de yew hêzo tesîrdar û aktîf o, ferz bikera.
