Rayberîya Têgêrayîşê Apoyî derheqê averşîyayîşanê peyên ê prosesê Aştî û Komelê Demokratîkî û qanûnê çarçewa de eşkerayî daye û wina vat: “Ma her firsendî de vat ke ganî Rayber Apo azad bo. Heta ke Rayber Apo nêkewo dewre û prosesî bi xo rayberî nêbero, qerarê ke ameyî girewtiş û lazimtîyê qanûnî ke do bêro vetene nêeşkenê bêrê ca.
Rayberîya Têgêrayîşê Apoyî derheqê qanûno çarçewa û tedeyîyanê ci aye de eşkerayîyêk vila kerd û dîyar kerd ke heta ke Rayberê Şarê Kurdî Abdullah Ocalan nêkewo dewre û prosesî rê bi xo rayberî nêkero, qerarê ke ameyî girewtiş û lazimtiyê qanûnan ê ke do bêrê vetene, nêeşkenê bêrê ca.
Eşkerayîya Rayberîya Têgêrayîşî wina ya:
“Munaqeşayê serê qanûnê çarçewa ke ameyoxê şaranê Tirkîya eleqedar kena, bi hawayanê cîya dewam kenê û mîyanê raya pêroyî de zî vila benê. Demo ke merdim bala xo dano serê munaqeşayan û agahîyanê ke çimeyanê akerdeyan ra vila benê, babeta nêzdîbîyayîşê cîdî yê serê nê qanûnî de kewenê mîyanê fikaran.
Rayber Apo qiseykerdişê 20ê temmuze de dîyar kerdbi ke qanûnê ke do bêro vetene, ganî sivik, teng nêbo, ganî bi ê hawayî nêbo ke xizmetê ameyoxî rê nêkero û goreyê hesasîyetanê her di hetan bêro amadekerdiş. Çunke pawîyeno ke no qanûn seba qedênayîşê qeraranê seserrî yê mabênê şarê kurdî û dewleta Tirkan bibo gâmêke muhîme. O semed ra muhîm o ke qanûn wayîrê a taybetmendî bibo ke aştî seba xo biko amanc.
Seke pêro parçeyanê dinya de bîyo, aştî ewil zîwanî ra dest pêkena. Seba rêxistinêa ke xo fesih kerda û têkoşînê çekdarî yê vera Tirkîya qedênayo, şuxulnayîşê termanê sey ‘teror’, ‘rêxistina terorî’ hema destpêkî ra nê prosesê serê ameyoxê şaranê ma fîneno mîyanê probleman. Hîna destpêk ra hesasîyet nêyenê çiman ver. Bi kilmkî seba ke proses bieşkê rayra şêro, zaf muhîm o ke ziwan, pênase û tedeyîyê goreyê amancê ey bo.
Bêguman demo ke babete çareserkerdişê şerî bo, gâmê ke hetî erzenê ganî makul û ca de bibê. Rayber Apo û Têgêrayîşê ma na babete de haydar ê. Eke proses do nêbo mijûlkerdiş, bibo çareserî, o wext nêzdîbîyayîş zî ganî bi nê hawayî bo.
Sey Têgêrayîşê Azadîye ma dîyar kerd ke seba ke lazimtîyê vengdayîşê aştî û komelê demokratîkî bêrê ca, ganî Rayber Apo bieşko rolê xo kay bikero. Ma her firsendî de vat ke seba na babete zî ganî statuyê Rayber Apoyî eşkera bibo û azadîya ey bêra ca. Heta ke Rayber Apo nêkewo dewre û nê prosesî rê bi xo rayberî nêkero, mumkin nîyo ke qerarê ke ameyî girewtiş û lazimtîyê qanûno ke do bêro vetene bêrê ca.
Babeta statuyê Rayber Apoyî de Devlet Bahçelî vatbi, ganî bibo koordînatorê aştî û sîyasîbîyayîşî. Munaqeşayanê Îmralîyî de zî amebi qebulkerdiş ke Rayber Apo bibo koordînatorê aştî û sîyasîbîyayîşî, caardîşê qanûnî de ke do bêro vetene, rolê Rayber Apoyî amebi dîyarkerdene. Goreyê agahîyanê ke çimeyanê akerdeyan ra ameyî vilakerdene, eke statuyê Rayber Apoyî qanûn de nêro ca, hîna destpêk ra do vernîya pratîkbîyayîşî de bibo asteng. Nê semedî ra muhîm o ke statuyê Rayber Apoyî zelal bo ke muzakerekerdox û muxatabo sereke yo.
Hetê bîn ra, goreyê ruhê nê prosesî nîyo ke prosesê aştî û komelê demokratîkî tena asta bêçekbîyayîşî de bêro mojnayene. Vejîyayîşê qanûnê kokî yan zî qanûnê çarçewa yeno o mana ke nê qanûnî ra pey de do qanûnê bînî bêrê vetene û gâmî bêrê eştiş. Nê semedî ra eke bêro dîyarkerdene ke qanûno ke do bêro vetene do qanûnê kokî bo, proses do dima bi qanûnanê demokratîkbîyayîşî yê seba çareserkerdişê probleman bieşko aver şêro, do zerrîya şaranê Tirkîya rehet ba û bawerîya seba prosesî zêde bikero.
Seke ma ney ra ver zî zaf reyan dîyar kerd, ma do nêzdîbîyayîşê xo yo esasî dimayê vînayîşê qanûnî dîyar bikerê. Bêguman eke qanûn rind bo ma do hîna zaf teşwîq bikerê û berpirsyarîya xo bîyarê ca.”
