Riha- Gazî Ciwan Azad ke qonaxê destpêkî yê Şorişê 19ê temmuze de ca girewto û di rey birîndar bîyo, dîyar kerd ke no şoriş mîrasê serewedaritişan ê tarîxî û keda 25 serran ê Rayberê Şarê Kurdî Abdullah Ocalanî ya û wina vat: “Hêzê ke ma vera hêrişanê hovane payan ser verdayêne, tena îrade û xeyalê azadîye bî.”
Şorişê 19ê temmuze ke Rojava de destpêkerd û sey ‘Şorişê Cinî û Şaran’ pêroyê dinya de veng da. Serrgêra 14. de bi rûmetê ke gird yeno pêşwazîkerdene. No şorişî ke tarîtîya DAIŞ’ê hovî çinkerde û cuyêka newî awan kerde. Berdêlê zaf girdî û tarîxî xo ra pey verdayê. Yew afîrînêrê nê şorişî û gazîyê şer Ciwan azad, muhîmî, tarîx û ruhê xoverdayîşî yê Şorişê 19ê temmuze ajansê ma rê erjna.
‘Tarîtî ra ver bi roşnayîya şorişî’
Gazî Ciwan Azad ard ziwan ke o binê tesîrê kulturê xerîbî û sîstemêko îqtîdarperest û bişîdet de pîl bîyo û destpêk de zî nasname û tarîxê xo ra bêpar mendo. Ciwan Azadî da zanayene ke polîtîkaya qirkerdişî û asîmîlasyonû her tim şarê kurdî kerdo qurban la 19ê temmuze no tarîx serûbin kerd û wina vat: “Wexto ke ma kewtê pey kurdbîyayîş û tarîxî xo, ma vîna ke şarê ma ameyo parçekerdene û bê îrade ameyo verdayene. La roja 19ê temmuze, rastîya nê heme çîyan nîşanê ma da. Ê xeyalê ke ma her tim zerrîya xo de pîl kerdêne, bi şorişê 19ê temmuze reyde bîyî rastîyêke. No şoriş bi tesadufî awan nebî; bingeyê nê şorişî de kede, fikr, felsefe û rêxistinkerdişêk gird est o.”
‘Keda 25 serran û mîrasê 28 serewedaritişan’
Ciwan Azadî bale ante serê kokê tarîxî yê şorişî û dîyar kerd ke bingeyê nê şorişî serra 1979 de wexto ke Rayberê Şarê Kurdî Abdullah Ocalan derbasê Kobanî bî, ameyo eştene û nê çîyî ardî ziwan: Serek Apo bi ked û heskerdişêk gird bingeyêke awan kerd. Komel perwerde kerd û yew bi yew merdiman reyde kede da. No berhemê keda 25 serran a. Hêzo tewr gird şar o û rêxistinkerdişê nê şarî şoriş aferna. Şorişê 19ê temmuze eynî wextî de hewn û xeyalê 28 serewedaritişanê kurdan ê ke virazîyayê. Xeyalanê Seyîd Rizayî ra heta Simko Şîqaqî, Qazî Muhamedî ra heta Elî Şêrî, heme nê şorişî de bîyê yew.”
‘Ma mîyanê çeperan de bi hêvîya azadî şer kerd’
Ciwan Azad serra 2012 de tewrê hêzanê leşkerî yê pawitişê Rojava beno, behsê prosesê şer û birîndarbîyayîşê xo keno. Ciwan Azad vera şerê neyarî de dewa Kendale ya GirêSipî de di rey birîndar beno, o pênaseyê ey wextî û ruhê hevalîye bi nê vateyan ano ziwan: “Herişê serê ma zaf giranî bî, la hêvî û moralê ke şorişî dabî ma nêverdayene ma game peyde bierzê. Wexto ke ma şer kerdêne, ma zanayene ke xeyalê ma yê azadî estê, hêzo ke ma vera neyarê hov û bêîmkanî de payan ra girewtêne, tena îradeyê ma bî. Xeylê hevalê ma şehîd kewtî û ma moralo tewr gird înan ra girewt. Hevalê ma yê bi nêweşîya girane, hevalê ma yê emirdergî û hevalê ke tena giştêke serê destê înan ê tirabîyeyî mendîbî, bi eynî îradeyî şer kerdêne. Seba azadîya şarê xo, ma heme çî dabî verê çiman û birînê ma çimê ma de çinê bî.”
‘Şarê ma DAIŞ binvist û îradeyê dewletan şikit’
Peynîya qiseykerdişê xo de Ciwan Azadî vengdayîşê şarê kurdî kerd ke wayîr ro mîasê şorişî vejîye û wina vat: “Pawitişê welat û şarê ma, peyman û gureyê ma yê tewr pîroz ê. Ma soz da ke ma heta dilope peyênî ya gonîya xo şarê xo bipawê. Şarê kurdî bi xoverdayîşê xo ya vera DAIŞ’î hêz û îradeyê xo mojna heme dinya û naye ra îradeyê dewletanê banduran şikit. Ganî şarê ma ewro zêdeyêr ferqê hêzê xo de bo, wayîrê Rayberê xo, Şorişê xo û mîrasê şehîdanê xo vejîyo.”
