Platformê Dezgehanê Demokratîkan vera hêrişanê dîjîtalan û kampanyayanê sîyakerdişî yê ke sîyasetmedaranê kurdan ser o yenê kerdene, eşkerayîyêk weşanaye: “Ganî ma vera nê hêrişanê şerê taybetî bi tepşêko zana û rêxistinbîyaye bibê cewab.”
Platformê Dezgehanê Demokratîkan eşkerayîyêka nuştekîye vila kerde. Na eşkerayî vera hêrişanê dîjîtalan, xeberanê zûran û kampanyayanê sîyakerdişî ya ke platformanê medyaya dîjîtale de sîyasetmedar, dezgeh û şarê kurdan ser o yenê kerdene.
Platformî dîyar kerd ke ê prosesêk ra vîyarenê ke tede şîdet her qeyde cuya înan ser o tesîr kena û dorpêça qirkerdişî hema zî dewam kena: “Kesê ke nirxnayîş û vatişanê Rayber Abdullah Ocalanî çewt kenê û wazenê hêzo awanker ê haştî û azadîye bişiknê, wa bizanê ke praktîkê înan tarîx ser o ney, awe ser o ameya nuştene.”
Platformî vat ke hêrişê bêîtîbarkerdişî yê vera destkewteyanê şarê kurdan, sey cehdê çewtkerdişê rojdemî yenê ramitene: “Ma vera polîtîkayanê şerê taybetî yê ke bi serran o dewam kenê, ewro zî Prosesê Haştîye û Komelê Demokratîkî kenê hedef. Demêk de ke warê sîyasetê demokratîkî hîna muhîm bîyo, nê hêrişî tesadufî nîyê.”
Platformî ard ziwan ke fehmê înkarî yo ke bi serran o wazeno têkoşînê kurdan bişikno û ciwan û cinîyan bêrêxistin verdo, hema zî dewam keno. Goreyê Platformî, seba ke prosesê muzakere yo ke 27ê sibate ra nata dewam keno, bi serkewtişî biramîyo, têkoşînê vera nê fehmî esas o.
Platformî peynîya eşkerayîye de waşt ke her ferd û dezgeh vera nê merkezanê qilêrinan wezîfe û têkoşînê xo dewam bikerê: “Ganî ma vera heme hêrişanê şerê taybetî bi tepşêko zana û rêxistinî bibê cewab. Ma do bi têkoşînê xo yê huqûqî û rêxistinî nê kesan her ca de teşhîr bikerê.”
