Maşallah Devrîm, kalikê Serhat Devrîmî yo ke Qetliamê Pirsûsî de bi 33 ciwananê sosyalîst û şorişgiran amebi qetilkerdene, qalê qetlîam û nêzdîbîyayîşê dewlete kerd û vat: “Goreyê bawerîya ma dewlete her çî zana û rind zana senî bîyo, la helbet rastîye bi hawayêko zelal nêvejîyaye meydan.”
Qetlîamê Pirsûsî 20ê temmuze 2015î de qezaya Pirsûsî ya Riha de, baxçeyê Merkezê Kulturî yê Amara de qewimîya. Nêzdîyê 300 ciwanê ke endamê Federasyonê Komeleyanê Ciwanan ê Sosyalîstan (SGDF) bîyê, semedê ke kaykilan bibê domananê Kobanî rê û tewrê xebatanê paştîdayîşê merdimîye bibê, Pirsûs de ameybî têhet. Demê ke ciwanan baxçeyê merkezê kulturî de eşkerayîya çapemenîye dayêne, yew xokiştoxê endamê DAIŞî mîyanê ciwanan de teqabarê serê xo teqnayî. Netîceyê nê hêrişê xokiştişê yê wehşî de 33 ciwanan wefat kerd û zêdeyî 100 kesî zî birîndar bîyî. Yew ciwanê ke nê qetliamî de wefat kerdbi zî Serhat Devrîm (19) bi. Kalikê Serhatî, Maşallah Devrîm seba şexsîyetê tornê xo û qetlîamî ser o Ajansê Welatî rê qisey kerd.
‘Heskerdişê ey seba welat û şarê kurdî zaf zêde bî’
Kalikê Serhad Devrîmî, Maşallah Devrîm bale ante serê zerrîwazîya tornê xo û da zanayene ke o mîyanê têkoşînî ke seba şarê kurdî amade bîyo bi zerrîwazîya xo ameyene naskerdene û vat: “Hema domanîya xo de ey embaz û domanê ke îmkanê înan ê ekonomî kêmî bî dormeyê xo de kom kerdêne û ardêne keye. Pîrîka xo reyde zaf samîmî bî. Hema domanîya xo de şînê mîyanê bexçî domanî kom kerdêne û înan reyde ‘erefane’ yanê parekerdişê werdo komunal kerdêne û pîya werdêne. Înan reyde pîya niştêne ro û weriştêne. Çiqas pîl bî, heskerdişê ey yê seba welat û şarê kurdî zî ende pîl bî. Helbet ey ma ra zî quwet û destek girewtêne, lajek wina pîl bî.”
‘Kiştox bi tena sereyê xo nêşkeno nê karî bikero’
Maşallah Devrîm detayê roja qetlîamî û hewayê huquqî yê qetliamî ard vîrê xo û nê çîyî vatî: “Goreyê bawerîya ma dewlete her çî zana û rind zana senî biyo, la helbet raştiye bi yew hawayêko zelal nêvejîya meydan. Eke paşta înan de quwet û hêzêko bîn çinbîne, nê çîyî nêbîyêne. Kiştoxê ke nika vanê zere de yo û ceza girewta, ma bawer nêkenê, beno ke veto û şîyo zî. Ey bi tena sereyê xo nêşkeno nê karî bikero, merdimê ke pîya bî zafî bî.”
‘Birîndarî bi gaz ameyî fetisnayene’
Maşallah Devrîm da zanayene ke wexto ke no hedîse qewmîya o bi xo zî şîyo Pirsûs (Suruç) û vat: “Şahidanê çimdaran mehkeme de înan ra vato ke yewê ke bombe teqna xelas kerdî, ‘Yewo serepişte girewtbî mîyanê xo û polîsan o girewt û berd xelesna. Wexto ke bombe teqîya, nê kafirê ke bombe teqna, verdayê ke nê 33 ciwanî û teberê înan de zî kesê ke birîndar bî binê gazê polîsan de bifetisîyê.’ Şarê uca vatêne ke nêverdayê ambûlans û merdimî birîndaran rakerê û verdayî ke ciwanî uca de bimrê, nêweşxane de zî birîndarî bi gaz ameyî fetisnayene. Çi heyf ke ewro nê raştîyî nêvejîyayê meydan, berdî û ardî û vatî ke di polîsî uca de birîndar bîyê yan ameyê kiştene, nê pêro hîkayeyî bî û nê hîkayeyê dewleta kûre ya Tirkîya bî ke kiştoxî xelas kerdî.”
‘Pratîk de ma tu çîyî nêvînenê, ganî qanûn vejiyo’
Maşallah Devrîm dîyar kerd ke waştişê înan o yo ke êdî ciwanê înan şehîd nêbê, ciwanê înan nêrê kiştene û aştî virazîyo, la ê bi asanî bawer nêkenê û wina domna: “Tornê mi şehîd bi û şî, labelê wa ciwanê ma yê bînî nêşorê. Ez nika zî bawer nêkena; seba ke nê prosesê mutabakatî de, nê waştiş û gamanê ke amade kerdê nêyenê meclîs. Eke samîmî bîyêne, ganî heta nika qanûn vejîyayene. Ganî nê kesê ke çekî nayê ro, sîlehê xo veşnayê û ko ra ameyê, biameyêne û bikewtêne warê sîyaset û demokrasî. Nê hetî de, bi qenaatê mi eşkerayîyê Devlet Bahçelî yê îqtîdarî ra samîmêr ê, la reyna zî ma pratîk de tu çîyî nêvînenê.”
‘Waştişê ma tena o yo ke prosesê aştîye dewam bikero’
Maşallah Devrîm peynîya qiseykerdişê xo de bale ante serê berdêlanê giranan yê ke ameyê dayene û vat: “Ewro tena mîyanê sînoranê Mûşî de 5 hezar û 600 şehîdê ma estê û ez qalê temamê Kurdistanî nêkena, tena Mûş de hende berdêl ameyo dayene. Waştişê ma tena no yo ke prosesê aştîya demokratîke dewam bikero, na aştîye virazîyo, aştî mabênê şaran de bibo û êdî wa ciwanê ma nêrê şehîdkerdene, teberê nê waştişî de tu amancê ma yo bîn çin o.”
