Înîsiyatîfê Dayîkanê Aştîye yê Stenbolî derheqê serrgêra 1. a çekveşnayîşî de eşkerayî da. Dayîkanê Aştîye veng da dewlete û waşt ke vera çekveşnayîşî de gamî bêrê eştişî.
Înîsiyatîfê Dayîkanê Aştî yê Stenbolî bi amancê serrgêra yewine ya merasimê çekveşnayîşê endamanê Têgêrayîşê Azadîye yê Kurdîstanî yan zî Koma Aştî û Komelê Demokratîke cayê xo yê qezaya Fatîhî de eşkerayî da.
‘Domanê ma bi sereberzî şîyî û ganî bi sereberzî agêrê’
Verê Dayîka Aştîye Sûltan Bozkûrt qisey kerd. Sûltan Bozkûrt bale ante ewro ser û dîyar kerd ke seba dayîkan ewro rojêka taybet a û vat: “Serrêke verê cû domananê ma çekê xo veşnayî. A roje seba ameyoxî rojeke roşn a. Ma vat beno ke domanê ma biresê ma. Labelê serrêke vîyarte la hema zî qet yew game nêameya eştene. Domananê ma rê vanê ‘terorîst’. Ma nê vateyî qebul nêkenê û şermezar kenê. Dejê dayîkan hempar o. Goniya eskeran ser o heta nika polîtîka rayra berde. Gereka mayê eskeran zî vajê ma şer nêwazenê. Vengdayîşê ma seba dewleta Tirkîya no yo; ganî bilez gaman bierzo. Ma vanê domanê ma bi sereberz şîyî û ganî bi serberzî agêrê. Ma qet çîyê bînî qebul nêkenê. Ma şerî rê vanê ney, wa nika aştî bêro ca.”
‘Nêeştişê Gaman gumanan fîneno sereyê ma’
Dayîka Aştî Guler Bûgday zî qisey kerd û vat ke dayîkî her tim aştî wazenê û wina dewam kerd: “La serrêke ya qet yew game nêameya eştene. Ma seba naye zaf xemgîn ê. Serrêke verê cû domananê ma çekê xo veşnayî. Labelê vera na game de qet yew game nêameya eştene. Ma bi gameştîşê domananê xo sereberz ê. Eke kurdî est ê, heqê înan û yê Sereke înan zî est ê. Seba ke no proses bireso amancê xo, ganî heqê Kurdan û heqê Sereke înan zî bêrê dayene. No 50 serrî yo ma vanê aştî. Serekê ma prosesêk da destpêkerdene. Ma bi Serek û domananê xo bawer ê. Aştî seba heme şaran hewce ya. Gamnêeştişê dewlete ma de şik û fikaran peyda keno.”
