Îran de seba ke aktîvîst Perîa Dadgersefa protestoyanê girseyî yê aşma çeleyî de ca girewto, aye rê 10 serrî cezaya hepsî ameye dayene. Ame dîyarkerdiş ke mehkemaya temyîzî no qerar tesdîq kerdo, labelê do 6 serrî na ceza bêrê înfazkerdene.
Cezaya 10 serran ke Îran de seba aktîvîst Perîa Dadgersefa ameybî dayene, hetê Mehkemaya Temyîzî ya 36. ya Eyaletê Tehranî ra ameye tesdîqkerdiş. Perîa Dadgersefa bi sucê “seba ke vera ewleyîya zereyî ya welatî suc bikerê, kombîyayîş û pêkerdiş” ameye muhakemekerdiş. 4 serrê cezaya aye ame taloqkerdiş, 6 serrê bînî zî do bêrê înfazkerdiş.
Perîa Dadgersefa aşma çele de tewrê protestoyanê girseyî bîbî. Aye reyde Ribwar Marabî zî hetê Mehkemaya Şorişî ya Tehranî ra 10 serrî cezaya hepsî girewtbî. Mehkemaya Temyîzî qerarê seba her diyan zî bi eyn hawayî de tesdîq kerd.
Agahîyî seba destbendkerdişê Perîa Dadgersefa nêameyê parekerdiş. Goreyê agahîyan do mîyanê aşmêk de hetê zindanê Evînî ra seba înfazê ceza, vengdayîşêk seba Perîa Dadgersefa bêro kerdiş.
