Li Amedê ji bo Şeyma Ûlûdag (Evîndar Zîlan)ê bernameya bîranê hate li darxistin. Dayîk Aysel Uludagê diyar kir ku ew ê tu car şehîdên xwe ji bîr nakin û got: “Bi keda şehîdan em heya vê astê hatin.”
Şeyma Ûlûdag (Evîndar Zîlan) di Nîsana 2019an de li herema Xerzanê di pevçûnekî de gihişt şehadetê. Bi pêşengtiya MEBYA-DERê Amedê serdana bîranîna şehîd Şeyma Ûlûdag (Evîndar Zîlan) hat kirin. Bîranîn ku li mala şînê ya Haci Kadrî Davûtoglu ya Dîclekentê ya Peyasê hate danîn. Rêveberên MEBYA-DERa Amedê, Dayîkên Aştiyê, endamên saziyên sivîl, nûnerên partiyên siyasî û gelek kes tev li bîranînê bûn. Di bîranînê de wêneyên Şeyma Ûlûdag (Evîndar Zîlan) hatin danîn. Bîranîn ji bo hemû şehîdên Tevgera Azadiyê deqeyek rêzgirtinê dest pê kir. Piştî rêzgirtinê dirûşmên “Şehîd namirin”, “Bijî Serok Apo”, “Jin jiyan Azadî” hatin berzkirin.
‘Em bi keda şehîdan hatin vê astê’
Di bîranînê de endama Rêvebera MEBYA-DERê Muhsînê Aslan axivî. Muhsînê Aslan di axaftina xwe de bal kişand ser keda cangoriyên Tevgera Azadiya Kurd û got: “Serê Serok Apo û hevalê wî sax be. Em jî soz didin şehîdên xwe ku em ê ji rêya wan venegerin. Em tu car şehîdên xwe ji bîr nakin û em ê navê wan di dîrokê de bidin nivîsandin. Bi keda şehîdan em heya vê astê hatin.”
‘Naxwazin ciwanên Kurd werin kuştin’
Xalê Şeyma Ûlûdag (Evîndar Zîlan) Xalit Ozbaş destnîşan kir ku gelê Kurd niha êşa xwe bi hev re parve dike û wiha pê de çû: “Ez bawerim îro vê êşê hemû dayîk û malbatên Kurdistanê, diêşin, parve dikin. Şehîda me şehîda we ye, rêya wan rêya me ye û rûmeta me ne. Em gelê Kurd ne gelekî zilimkar in, gelê Kurd tenê nasnameya xwe û azadiya xwe dixwazin. Em êdî naxwazin ciwanên Kurd werin kuştin.”
‘Serê me tevan sax be’
Dayîka Şeyma Ûlûdagê (Evîndar Zîlan) Aysel Uludag di bîranînê de axivî û got: “Keça min bi rûmet e. Ez li hember keda wê û hemû şehîdan bejna xwe ditewînim. Serê me tevan sax be.”
