Greva karkerên înşata Nexweşxaneya Bajêr a Amedê berdewam dike. Endamên Platforma Ked û Demokrasiyê serdana karkeran kir û gotin divê demildest karker vegerin ser karê xwe.
Karkerên girêdayê Fîrmaya Hermetê yên ku di înşata Nexweşxaneya Bajêr a Amedê de dixebitin ji ber daxwaza mafên xwe yên sendîkayî ji kar hatibûn derxistin û piştî vê yekê dest bi grevê kirin. Greva karkeran 4 roj in li Kolana Dorşîn a li ber nexweşxaneyê re derbas dibe berdewam dike. Heya niha gelek partiyên siyasî û saziyên civakî ji bo piştgiriyê serdana karkeran kir.
Îro jî endamên Platforma Ked û Demokrasiyê ya Amedê ji bo piştgiriyê serdana karkeran kir. Endamên platforma Ked û Demokrasiyê ya Amedê ji nêzî greva karkeran bi dirûşma, ‘Bijî berxwedana karkeran’ û tilîliyan meşiyan. Piştî meşê li ser navê platformê Sebahat Sever daxuyanî xwend û bang li karmendan kir ku demildest ji biryara xwe ya derxistina karkeran a ji kar vegerin. Sebahat Sever got ku heya 90 karkerên ji kar hatine derxistin venegerin ser karê xwe ew ê mil bi milê karkeran li ber xwe bidin û wiha axivî: “Sermaye dema karker dibin endamên sendîkayan gelekî ditirsin û wan ji kar dertêxin. Ji rêxistinbûyîna karkeran ditirsin. Lê em ê rêxistinbûyîna xwe xurt bikin û heya em mafên karkeran bi dest bixin em ê tekoşîna xwe berdewam bikin.”
Daxuyanî bi çepik û dirûşmeyan bi dawî bû.
