Piştî hedef nîşandana Amedsporê ya ji hêla Serokê Giştî yê BBPê Mûstafa Destîcî ve, alîgirên Amedsporê li ber avahiya BBPê ya Peyasê hedefnîşandana Mûstafa Destîcî protesto kirin û pankarta ‘Hûn kor bin jî hûn ê bibînin’ vekirin.
Serokê Giştî yê Partiya Yekitiyê ya Mezin (BBP) Mustafa Destîcî di civîna çapemeniyê ya navenda giştî ya partiya xwe de navê Amedsporê hedef girtibû û îdîa kiribû ku divê navê tîmê bibe ‘Diyarbakirspor’ û wiha gotibû: “Li Tirkiyeyê bajar heye ku navê wî Amed e? Em vê yekê qet qebûl nakin. Diviyabû Federasyona Futbolê ya Tirkiyeyê (TFF) jî vê qebûl nekiriya û lîsansa wan tesdîq nekiriya.”
Piştî wê hedef nîşandanê hezkiriyên Amedsporê gelek cihan bertek nîşandan. Alîgirên Amedsporê, endamên Koma Ultramedê li dijî wan gotinên Amedsporê dike hedef li ber avahiya BBPê ya girêdayî navçeya Peyas a Amedê şevê din protesto kirin û pankartên “Hûn kor bin jî hûn ê bibînin” û “Ew ê te tune bihesibînin, lê tu yê her wext hebî” vekirin.
‘Amedspor kelecana hevpar a bi milyonan mirovan e’
Koma alîgirên Amedsporê yên Ultramedê li dijî gotinên nijadperest li ser platformên medya ya dîjîtal daxuyaniyeke nivîskî jî parve kir û wiha got: “Hewldana we ya ji bo parçekirina civakê bi rêya Amedsporê û kirina mijara nîqaşê ya hebûn û nasnameya klûbeke ku bi milyonan mirovan dil dayê, nayê qebûlkirin. Amedspor bi kerema kesekî nehatiye vê astê. Bi têkoşîna qadê, bi xwêdana eniyê, bi ked dayîna lîstikvanên xwe û bi piştgiriya alîgirên xwe yên ku di trîbûnan de tîma xwe bi tenê nehiştine, derketiye Lîga Superê. Li şûna ku hûn navê Amedsporê bikin mijara nîqaşê, li pirsgirêkên rasteqîn ên futbolê binêrin. Em ê dev ji navê xwe, ji nasnameya xwe, ji bajarê xwe û ji tîma xwe bernedin. Ji ber ku Amedspor tenê ne klûbeke futbolê ye. Amedspor; têkoşîna li qadê, piştevaniya li trûbûnê û kelecana hevpar a bi milyonan mirovan e. Ne gotinên we yên parçeker û ne jî daxuyaniyên we yên ku hedef nîşan didin, dikarin vê rastiyê biguherînin.”
