Erdlerzê Mereşî ser ra 3 serrî vîyartî la birînî hema baş nêbîyî. Erdlerzî bajarî rijnayî la sîyasetê rantî cuya mexdûran rijnaye. Bi hezaran kesî mabênê konteyneranê tengan û sîyasetê rantî de paweyê heqê xo yê.
6ê sibata 2023î de erdlerzê ke merkezê ci Mereş bî, 11 bajarê Kurdîstanî û Tirkîya lerznayî. 3 serran ra dima tabloya herêman; sozê ke nêameyî caaardene û mexdûrîyetêka xorîn a. Serekê AKP’yî Tayîp Erdoganî soz dabî ke do serrêk de 650 hezar banan bidê hemwelatîyan, la hema nêmeyê nê banan zî temam nêbîyî. Bi hezaran keyeyî hema konteyneran de, mabênê serd û germî de ciwîyenê.
Sozê bananê bêpereyan badê weçînayîşî pûç vejîyayî. Hemwelatîyê ke banê înan xirab bîyî, neçar mendî ke TOKÎ reyde peymananê 20 serran îmza bikerê. Sozê bananê bêpereyan bîyî deynê giranî. Îhaleyê viraştişî zî fîrmayanê nêzdîyê hukmatî rê ameyî dayene.
Hatayo ke erdlerzî de tewr zaf xirab bîbî, ewro krîzêko newe reyde rî bi rî yo. Dewlete bi qanûna “Herêma Rezerveyî” dest dayo milkê hemwelatîyan ser. Hemwelatî tersênê ke dima nêeşkê taxanê xo yê kehenan de reyna biciwîyê. Hetê huqûqî ra zî bêcezayîye est a, zaf mûteehîdî ke ameybî tepîştene, ameyî verdayene û tu rayedarê dewlete îstîfa nêkerd û ceza nêgirewte.
Bi seyan gede û girdî hema vindî yê û dewlete melûmatêko zelal nêdana keyeyan. 3 serranê merdîyan, keyeyê bêbanî û sîyaseto ke herinda cuye de rantî paweno, tabloya nê 3 serran na ya. Sîyasetê xeletî, îhaleyê ke nêzdîyê hukmatî rê ameyî dayene û bêvengîya huqûqî birînê 11 bajaran hîna xorîn kerdî.
