Platformê Kede û Demokrasîye yê Semsûrî, serrgêra 3. ya erdlerzê 6ê sibate de bi meşaleyan rayîrşîyayîşêk organîze kerd. Bi seyan kesî beşdar bîy.
Hemsereka DEM Partî ya Pêroyî Tulaye Hatîmogullarî, Hemsereka DBP’yî ya Pêroyî Çîgdeme Kiliçgun Uçar, parlementerê DEM Partî Ferît Şenyaşar û Alî Bozan û bi seyan welatîyî têwrê rayîrşîyayîşî bîyî.
Bi seyan kesî merkezê Semsûrî de cayê nêweşxaneyê kehenî de ameyî pêser û heta quleya saete rayîr şîyî. Rayîrşîyayîşî de hemwelatîyan resimê kesanê ke erdlerzî de cuya xo ra bîyî, tepîşt û pankartê “Ma şîn de yê, nêdanê xovîrrakerdene” berz kerdî. Hemwelatîyan bi yew vengî sloganê “Kes vengê mi eşnaweno?”, “Ma xo vîr ra nêkenê”, “Ma heqê xo helal nêkenê” û “Ma xo vîr ra nêkenê, ef nêkenê” eştî.
Rayîrşîyayîş bi ronayîşê qerefîlan binê quleya saete de temam bî. Dima Hemsereka DEM Partî ya Pêroyî Tulaye Hatîmogullarî qisey kerd û hemwelatîyê ke erdlerzî de cuya xo ra bîyî, ard vîrî û vat: “Ma xo vîr ra nêkenê û nêdanê xovîrrakerdene. Hukmatî hama zî felaketanê girdan ra ders nêgirewto. Hama zî keyeyê ke erdlerzî de kesê xo vindî kerdî, paweyê adaletî yê. Ma do nê keyeyan rê bibê piştîdayox.”
Saete 4.17 de mûmî ameyî veşnayene û seba kesanê ke erdlerzî de cuya xo ra bîyî, yew deqe vindertişê hurmetî ame girewtiş. Dima zî seba înan sela ameye wendene. Çalakîyê yadkerdişî do saete 10.00î de bi zîyaretê gorîstanan dewam bikerê.
