Verfekê Meclîsê Ekolojî yê Amedî Sabrî Kiliçî dîyar kerd ke înan Amed de Komunê Ramitişî awan kerdo û do vera talankerdişê xoza wirzê û bi komunan ekolojî bipawê. Kiliçî vat ke înan vera talanî se hezar belûyî ronayê.
Proseso ke serra 2015î de hetê dewleta tirkan ra ame xeripnayene û her hetî ra hêrişêko hîra da destpêkerdene. Bêmabên 10 serrî şerî dewam kerd. Encamê şeranê zehmet de xeylê daristanî hetê leşkeranê tirk û cerdevanan ra ameyê talankerdene. Sewbîna dewleta tirkan seba şeranê taybet aver bera, vernîya şîrketan akerd ke zozan û koyê Kurdîstanî talan bikerê. Şîrketî bi hemkarîya leşkeran kananê madenî awan kenê û xoza talan kenê.
Vera înan gelekî şaristananê Kurdîstanî de têkoşîno ekolojîk est o. Têgêrayîşê Ekollojî yê Mezopotamya vera talankerdişê xoza dest bi xebatanê ramitişê belûyan kerdo û Komunê Ramitişî awan kerdo.
Verfekê Meclîsê Ekolojî yê Amedî Sabrî Kiliç derheqê xebatanê ramitişê belûyan û Komunê Ramitişî de qisey kerd.
‘Vera talanî wayîrê xozaya xo vejîyê’
Sabrî Kiliçî dîyar kerd ke encamê şerê 50 serran de ke Kurdîstan de qewimîyenê, qirkerdişê ekolojîkî vejîyayê orte û wina qisey kerd: “Her cayê Kurdîstanî de xoza ameye talankerdene. Ewro welatê ma de behsê aştî û awankerdişê komelê demokratîkî yeno kerdene. La xebatê sermayeyî yê talankerdişê xoza hema zî dewam kenê. Ê xebatanê sermayeyî bi zîhnîyetê mêtîngerîye kenê. Verê talankerdiş bi polîtîkayanê şerî ameyêne kerdene, ewro ameyo bedilnayene û bi nameyê polîtîkayanê averşîyayîşî dewam keno. Her ca de kanê petrolî, xebatê gazê zinaran, viraştişê awbendan, kananê madenî, kananê xîzî yenê viraştene û talankerdişê daristanan yeno kerdene. Sewbîna projeyê GES’î est ê. Yeno waştene ke bi talankerdişê xoza merdiman bêçare verdê û înan koçê şaristanan bikerê. Vera ney Têgêrayîşê Ekolojî yê Mezopotamyayî qerar da ke bi mîlyonan dar û bi taybetî daranê belûyan Kurdîstan de ronê.”
‘Ma Amed de Komunê Ramitişî awan kerd’
Sabrî Kiliçî dîyar kerd ke heta nika Wan, Amed, Mardîn, Şirnex, Mûş, Colemêrg, Erzirom û Çewlig de se hezar belûyî ameyê ronayene û vat: “Heta ke ma hûmara ramitişê daranê belûyan biresnê mîlyonan do xebatê ma dewam bikerê. Her cayo ke tede cuye est ba, ma do uca de xebatanê ramitişî bikerê. Têkoşînê pawitişê û averberdişê erjanê komunal ê Mezopotamyayî yê ke bi hezaran serrî yo dewam kenê, bi awankerdişê komunanê ekolojîk û kooperatîfan do ewro zî dewam bikerê. Ma Amed de; Komunê Ramitişî bi n3e amancê awan kerd. Hetê Komunê Ramitişî ra bi mîlyonan belûyî Amed de ameyê komkerdene, ma ronayîşê înan da destpêkerdene û do ronayîşê belûyan dewam bikero. Ma do aştî û erjanê komunalîteyî awan bikerê û her ca bikerê daristan. Ma do komunanê ekolojîk awan bikerê û vera sermayeyî xover bidê.”
