Hemşaredara Amedî Serra Bucak kombîyayîşê arayî yê Serekîya Dayîreyê Polîtîkayanê Cinîyan ê Şaredarîya Amedî ya Şaristanê Girdî de rojnamegeranê cinî reyde ameye têhet. Kombîyayîşî de xebatê Şaredarîya Amedî yê serra 2025î rojnamegeranê cinî reyde ameyê parekerdene û erjnayene.
Serekîya Dayîreyê Polîtîkayanê Cinîyan ê Şaredarîya Amedî yê Şaristanê Girdî rojnamegeranê cinî reyde kombîyayîşêk organîze kerd ke Amed de xebitîyenê. Kombîyayîş otelêkê Amed de ame kerdene. Hemşaredara Amedî Serra Bucak, Hemsereka Rêxistina DEM Partî ya Amedî Gulşen Ozer, endamê meclîsê Şaredarî û xeylê rojnamegerê cinî beşdarê kombîyayîşî bîyê.
Arayî ra ver qiseykerdişî ameyê kerdene. Serra Bucak kombîyayîşî de qisey kerd û xebatê rayberîya herêmî yê cinîyan û xebatê Serekîya Dayîreyê Polîtîkayanê cinîyan ê serra 2025î pare kerdê û erjnayê.
‘Ma wazenê Amed bikerê şaristanê cinîyan’
Hemşaredar Serra Bucak dîyar kerd ke çapemenî nêba, cinî zî nêasenê û vat: “Cinîyê ke têgêrayîşê azadîya cinîyan de polîtîkayanê cinîyan ser o kar kenê, bi perspektîfê cinîyan xebitîyenê. Eke rojnamegerê cinî çin bî, xebatê cinîyan ê şaredarîyan zî nêasenê. Ma waşt ma embazanê cinî ê rojnameger reyde bêrê têhet, yewbînan bişinasnê û xebatanê xo înan reyde pare bikerê. Cinî têkoşînê azadîye rayra benê. Embazê cinî ê rojnamegerî problemê cinîyan ê nê şaristanî kenê xebere û ma agahdar kenê. Ma wazenê xebat û polîtîkayanê cinîyan de hîna zaf rojnamegeranê cinî reyde mîyanê dayîşûgirewtişî de bibê ke problem û tenganeyî cinîyan bêrê vînayene. Ma wazenê bi piştgirîya rojnamegeranê cinî Amed bikerê şaristanê cinîyan û têkoşînê cinîyan bimojnê.”
