Silêmanî de ekîbekê asayîşî eşt merkezê Têgêrayîşê Cinîyan ê Kurdan RJAK’î ser o û bê qerarê mehkeme merkezî qefilna. RJAK’î vengda selahîyetdaran ke wa qerar apey bêro antene.
RJAK’î eşkera kerd ke ewro serê sibayî hêzanê asayîşî eşt merkezê înan ser o û bê xeberdayîş û qerarê mehkeme merkezê înan qefilna. RJAK’î veng da selahîyetdaran û waşt wa qerar apey bigîrê.
RJAK’î derheqê sereştişê merkezê înan beyanatê çapemenîye da û nê vatî:
“Tam wexto ke problemê Kurdan û çareserkerdişê meseleyanê şarê ma rojev de yo û cinîyî her hetî ra wextê tengî de yê, ewro serê sibayî ekîbêkê asayîşî bê xeberdayîşî eşt merkezê ma ser û bê qerarê mehkeme merkezê ma qefilna.
Dezgehê ma têna semedê çareserkerdişê problemanê cinîyan û pawitişê heqanê cinîyan ame akerdene. Seba ke cinîyî aver şirê ma xeylê firsetî teqdîm kerdî. Ma xeylê aktîvîteyê kerdî û bi seyan dewayê cinîyan û dosyayê ci çareser kerdî.
Seba ke Mehkemeya Federale vato heme dezgeh û rêxistinê ke eleqaya înan bi têgêrayîşê azadîye est o wa bêrê qefilnayene dezgehê ma ame qefilnayene. Ma nê caardişî qebul nêkenê. Dezgehê ma xoser o, eleqeya ci qet bi partîyanê sîyasîyan û awanîyanê bînan çîn o.
Selahîyetdaran rê vengdayîşê ma no yo: “Binê tesîrê çewî de memanê, nê qerarê apey bigîrê.”
