Rayberê Ciwananê Partîya Zahmetkeşanê Kurdîstanî avûkat Shko Şhwan dîyar kerd ke perspektîfê Abdullah Ocalanî seba heme Rojhelatên Mîyanênî çareserî yo û vat: “Ma wazenê Abdullah Ocalanî reyde pêvînayîş bikerê.”
Ciwananê endamê Partîya Zahmetkeşanê Kurdîstanî û Partîya Sosyalîst a Kurdîstan (PASOK) seba prosesê Aştî û Komelê Demokratîkî, Herêma Federe ya Kurdîstanî ra ameyê vakurê Kurdîstanî û Tirkîya. Ciwanan Amed, Riha, Mardîn û Anqara de tayê pêvînayîşî kerdê. Dima ra zî dewa Amara ya qezaya Xelfetî ya Rihayî ke Rayberê Şarê Kurdî Abdullah Ocalan tede amaeyo dinya, zîyaret kerd. Ciwanî tewr peyên ameyê Anqarfa. Ciwnaan seba ke Rayberê Şarê Kurdî Abdullah Ocalanî reyde pêvînayîş bikerê, waştişname da Wezaretê Edaletî û vernîya wezaretî de eşkerayî daye.
Rayberê Ciwananê Partîya Zahmetkêşanê Kurdîstanî avûkat Shko Şhwan derheqê amancê ameyîşê vakurê Kurdîstan û Tirkîya de ajansê ma rê qisey kerd.
‘Amancê ma piştgirîya prosesê Aştî û Komelê Demokratîkî yo’
Avûkar Shko Şhwan ke Kerkuk ra ameyo, dîyar kerd ke xeylê partîyê başûrê Kurdîstanî waşto înan reyde bêrê la seba ke vîze nêvejîyaya nêeşkayê bêrê û amancê xo ser o wina vat: “Ma heyetêk endamanê partîyanê Kurdîstanî ra ameyê. Amancê ma piştgirîya prosesê Aştî û Komelê Demokratîkî yo. Ma wazenê no proses dewam bikerê û meseleyê kurdî çareser bibo. Ma nêwazenê şarê kurd êdî bindest bo. Nê semedî ra zî ma vakurê Kurdîstan û Tirkîya zîyaret kerd. Ma wazenê şîrê Girawa Îmraliyî û Rayber Ocalanî zîyaret bikero. Ma wazenê bi nê zîyaretî piştgirîya prosesî bikerê û dinya reyde pare bikerê.”
‘Şer êdî nê serdemî de qedîyeno’
Dewamê qiseykerdişê xo de Shko Şhwanî dîyar kerd ke perspektîfê Aştî û Komelê Demokratîkî seba pêroyê Rojhelatê Mîyanênî çareserî yo û wina qisey kerd: “No proses seba pêroyê herême aramî û başî yo. No proses seba ke heme şarê Rojhelatê Mîyanênî pîya û têduşt biciwîyêgama tewr başe ya. Rojhelatê Mîyanênî de seserra verêne bi şerî vîyarte. Nê seserrî de zî Rojhelatê Mîyanênî de bedilîyayîşêk est o. Ganî şarê Rojhelatê Mîyanênî zî goreyê nê bedilîyayîşî têbigêrê û no şer biqedîyo.”
‘Ciwanî rolêko gird gênê xo ser’
Peynîya qiseykerdişê xo de Shko Şhwanî îfade kerd ke ê rewra yo ke seba aştîyêka domdare herême de xover danê û do nika zî seba aştî xover bidê. Shko Şhwan bale ant rolê ciwanan ser o û qiseykerdişê xo wina qedîna: “Sey ciwanan ma zî ganî piştgirîya aştî bikerê. Ciwanî seba ameyoxî rolêko gird gênê xo ser. Ganî ma berpirsîyarîye bigîrê ke no proses baş vîyaro. Nika ra pey zî seba aştîyêka domdare biba, xebatê ma do dewam bikerê. Ma vanê aştî seba heme şaran a. Ganî ma pêro têduşt, azade û mîyanê aştî de biciwîyê.”
