Cinîyan derheqê qirkerdişê Dîlovasi de ame kerdiş ser o qisey kerdî û dîyar kerdî ke ê fehmê şertê binpaykerdişî de yê û do taqîbkerdoxê qirkerdişî bê.
Qezaya Dîlovasi ya Kocaelî de şewatê febrîqeyê kozmetîkî de hîrê ci ra tutî 6 karkeran dinyaya xo bedelnayî. 7 kesî zî birîndar bîy. Serdozgerîya Komare ya Gebzeyî derheqê şewatê 8ê teşrîna peyêne de cipersayîş da destpêkerdiş û 11 kesî ameyî destbendkerdiş. Înan ra 7 kesî ameyî tepiştiş.
Cinî bi pîya xurt ê (KBG) Taksîm Tunelî de semedê cinî û tutê Dîlovasi dinyaya xo bedelnayî, çalakî viraşt. Pey çalakîya KBGî Melîke Tahmaz û Gulyeter Aktepe ajansê Jinnewsî rê qisey kerd.
‘Ma do taqîbkerdoxê ci bê’
Melîke Tahmaz ard ziwan ke do taqîbkerdoxê qirkerdişê Dîlovasi bê û wina va: “Ma hemverê cînayetê karî, bêasayîşê cinîyan, sîstemo ke tutan ver bi sûcî benê, nêgirewtişê tedbîranê merdişê tutan, karkerîya tutan, mahkûmkerdişê karkerîya erjane MESEM’î de, ameyî têhet. Ma do taqîbkerdoxê na dewa bê.”
‘Cinîyan her wext vengê xo berz kerd’
Gulyeter Aktepe dîyar kerd ke têgêrayîşê cinîyan her wext hemverê qetilkerdişê karkerê cinîyan de vengê xo berz kerdo û wina ard ziwan: “Ma zanê ke sîstemo ke karkerê cinîyan qetil keno, şert û mercê xebatê nêweşî ferz keno kapîtalîzm û patrîyarkal o. Hem tutê kênayî mektebî ra yenê dûrvistiş hem zî tutê karkerî MESEM’an de yenê binpaykerdiş. Ma zanê ke nê cayan de binpaykerdiş, bêkontrolî û polîtîkayanê keyeyî est ê. Ma fehmê şert û mercê binpaykerdişî de yê. Hemverê nê de têkoşînê ma dewam keno. Ma do taqîbkerdoxê qirkerdişî bê. Hemverê binpaykerdişê keda cinî ma do serewedaritişê xo bidê domnayîş, têkoşînê xo bidê domnayîş.”
