1ê teşrîna peyêne de qezaya Sûr a Amed de, grûbêka ke 20 kesanê selefîyan ra ameyêne pê, hêrişê hîrê cinîyan kerd. Cinîyê ke hêrişê înan ame kerdene, dîyar kerd ke bi nê kerdişî wazenê azadîya cinîyan asteng bikerê û dîyar kerd ke do vera nê hêrişan xover bidê.
Şewa 1ê teşrîna peyêne de qezaya Sûr a Amedî de grûbêka nêzdîyê 20 kesanê selefî yanî dînperest ra ameyêne pê, hêrişê keyeyo ke hîrê cinî tede mendêne, hêrişê ci kerd. Cinîyê ke seba ewleyî nêwaştêne nameyê xo eşkera bikerê, behsê a şewa ke hêriş ame kerdene, kerd.
Ê cinîyan ra yew ke hêrişê înan ameyo kerdene, da zanayene ke şewa 1ê teşrîna peyêne saete 21:30î de camêrdo ke rîyê ey derg, kefîyêka sîya û sipî ey ser o bîya, dayo berê înan ro û wina vat: “Ez şîya qatê cor, uca de ka yeno dîyar beno. Dima mi dî ke merdimo ke rîyê ey derg o, kefîyêka sîya û sipî ey ser o ya vano berî akere, mi vat ‘ti kam î, ti ameyê çi?’ Embazê mi cêr de bîyê, înan zî vato qey embazê ma yê berî akerd. Senî ke mi dî berî akerd, ez şîya cêr û ez ewnîyaya ke kesêk bîyo pancês kes. Ê bînî zî cêrd paweyê akerdişê berî vindertê ke hêrişê zereyî bikerê.”
Kesanê ke keye de hêrişê înan kerdo, kuçe de zî hêrişê înan kerdo
Cinîyan dîyar kerd ke 2ê teşrîna peyêne de zî demo ke cadeyê Melîk Ahmet ê qezaya Sûr de ê kesanê ke keye de hêrişê înan kerdo, kuçe de rastê înan ameyê û waşto hêrişê înan bikero. Dima ke waşto hêrişê înan bikerê vengdayo polîsan la polîsan tena bi erşawtişê ekîbekê waşto hetkarîya bikerê û dima ra polîsî înan gêrayî û seba teşhîskerdişê di kesan vengda înand dayo. Cinîyan dîyar kerd ke şarê taxe zî polîsî zî zanê ke ê kesî kam ê û çi kar kenê, la nêzanê ke di kesî ke grûbe ra dîyar kerdê, kes înan gêreno yan ney.
‘Şîdeto psîkolojîk kenê’
Cinîyan dîyar kerd ke ê nêwazenê kuçeyanê Sûr ra fek veradê û vengda ke na babete de destê kamî ra çi yeno wa bikerê. Cinîayan dîyar kerd ke verê zî ê ameyê tacîzkerdene û nê çîyî vatî: “Wexto ke ma rayra şîyene, ma ra vatêne ‘şeytan, bijî Îslam, bijî Hîzbullah.’ Gedeyê înan kereyî eştêne keyeyê ma, verê berê keyeyê ma de roniştêne, mêmanan ra persî persayêne, vatêne ‘şima çira şonê nê keye?’ Verî ra ma eciz kenê. Dizdîya ma zî kerde. Seba ke ma taxe ra vejê heme kenê.”
Cinîyan bale ant roja ke hêrişê înan ameyo kerdene ser o û dîyar kerd ke Roja Kobanî ya Dinya de, rojêka muhîme de hêrişkerdişê înan normal nîyo.
‘Ma wazenê piştgirîya raya pêroyî biba’
Cinîyan dîyar kerd ke seba ke na mesela çareser bikerê Konseya Şaristan a Amedî, DEM Partî, TJA, Komela Cinîyan a Rosayî, KASED, şaredarî û muracatê Şûbeyanê ÎHD û OHD’yî yê Amedî û Baroyê Amedî kerdo. Cinîyan dîyar kerd ke hedîseyê winasînî zaf reyan qewimîyenê la êdî ganî şar nê çîyan bieşnawo û çareserîyêka bingeyîn biba.
