Hêrişê hemverê Rojawanî her ke şinê zêde benê û cinîyê Amedî reaksîyon vera hêrişan mojnayî. Cinîyan dîyar kerd ke wa dewlete vera berjewendîyê xo aştî pê bîyaro.
Tirkîya û Artêşa Neteweyî ya Sûrîye (SMO) ya girêdayê aye hemverê şarê Rojawanî hêrişanê xo roj bi roje zêde kena. Serekê Hêzê Demokratîke yê Sûrîye (HSD) Mazlum Ebdî 11ê kanûne de dîyar kerd ke adirbest kerdê. La Tirkîya goş nêda nê qerarî û qirkerdiş û îşkenceyanê xo dewam kerd. Nê şerî de tewr zêde tesîr benê bêşik xebatkarê çapemenîye yê. 19ê kanûne de rojnamegere Cîhan Bîlgîn û Nazim Daştan ke xeberan taqîb kerdêne, hetê Tirkîya ra bi SÎHAyî ameyî qetilkerdiş. Reaksîyonê hemverê hêrişan, her cayê dinya de dewam kenê.
Amed de cinîyan derheqê hêrişê hemverê Rojawanî de Jinnewsî rê ercnayîş kerdî.
‘Dewlete vera berjewendîyan ganî aştîye pê bîyara’
Ayşe Karataş: Bi raştî na rewşe xeylêk xemgîn a, ganî peynîya şerî bîyarê, wa êdî peynî bibo. Ganî êdî nê merdimî xemgîn nêbê, mexdûr nêbê û nêmirê. Ganî êdî dest nêerzê înan, ez qet qebûl nêkena. Ez wazena dewlete hetkarî bikera û çi lazim bo, bikera. Ganî şer peynî bibo. Helbet ez sey merdimêke nêwazena kes xemgîn bibo, bila kes mebermo û wa kes nêmiro. Ez wina fikrîyena ke ganî dewlete bi wezîfeyê xo têbigêra. Ganî dewlete vera ke berjewendîyê xo qetî bikerê, aştîye pê bîyarê.
‘Ma qetilkerdişê rojnamegeran şermezar kenê’
Fîlîz Salîhoglu: Wa şer vindero, her kes şêro welatê xo. Ma rehet bibê, ê zî rehet bibê. Yanî ez qetlîam bi tu hawayî baş nêvînena, tehemûl nêkena. Ma kiştişê di rojnamegeran şermezar kenê. Xêrcê nê cuya her kesê ke uca ameyî qetilkerdiş, muhîm a. Şer çîyêk baş nîyo. Ganî aştî bêro û şerî vinderê. Ganî merdim wayîrê cuye xo vejîyo, her babete de bifikrîyo. Azadîya şarî nika bi tu hawayî nîna hesibnayîş. Wa şer vindarnê.
‘Yewin waştişê mi her kes hemverê şerî de bibo yew’
Aynur Zehra Şîwa: Ma nêwazenê keyeyê ma newe ra bêrê rijnayîş. Ma wazenê ke şer peynî bibo la şer ancî dest pêkerd. Wexto ke ma ameyî tîya zaf zor bî, wexto ke ma şinawit şer dest pêkerdo ma xemgîn bîyî. Ma keyfweş bî ke ma do agêrê welatê xo la şer ancî dest pêkerd. Ez hêvî kena êdî başêr bibo û ma agêrê welatê xo. Waştişê mi o yo ke pêro kesî bêrê têhet û bibê yew.
‘Ma wazenê peyser abigêrê’
Fatma Şîwa: Ma wazenê her çî baş bibo, şer bêro vindarnayîş û ma agêrê. Wa dayîkî mebermê, tutî sêwî nêmanê. Eke şer peynî bibo, ma wazenê agêrê.
Dîlan Uvat: Ez semedê qetilkerdişê cinîyan xeylêk xemgîn bena. Rojawan de cinî yenê qetilkerdiş û keyeyê înan yenê xirakerdiş. Cayê înan çin o ke şêrê. Ma hemverê nînan de tewr zêde xemgîn benê. Ez wazena aştî û têduştî pê bêro. Ez wazena tewr zêde wareyê azadîye bibê.
