Hemverfekê Komîsyonê Ziwan, Kultur û Hunerî yê DEM Partî Heval Dilbihar programê akerdişê komxebata “Stratejî û Polîtîkayê Têkoşînê Seba Ziwanê Kurdkî” de qisey kerd û dîyar kerd ke heta ke heme qanûnan de statu û perwerdeyîya bi Kurdkî nêrê qebulkerdene, aştîyêka rast û menda awan nêbena.”
Komxebata “Stratejî û Polîtîkayê Têkoşînê Seba Ziwanê Kurdkî” ke hetê Sazgehanê Ziwanê Kurdkî û Platformê Sazgehanê Demokratîk ra yeno awankerdene û do 2 rojan dewam bikera, Salona Veyveyî ya Ciraganî ya qezaya Armûşî ya Wan de dest pêkerd. Salon de pankartê “Statuya Kurdkî, perwerdeyîya bi Kurdkî” û “Seba ziwanê Kurdkî têkoşîn û xebat” ameyê aliqnayene. Endamê sazgehanê sîvîl, temsîlkarê sazgehanê demokratîk û partîyê sîyasî û xeylê kesî beşdarê komxebate bîyê.
‘Ma sipasîya Ocalanî kenê ke nê îmkanî dayê ma’
Programê akerdişî de Hemverfekê Komîsyonê Ziwan, Kultur û Hunerî yê DEM Partî Heval Dilbihar qisey kerd û vat: “Ma ewilî rêzdarî û minetdarîya xo seba Baba Tahirê Ûryan, Feqiyê Teyran, Mensûre Kurdistanî, Cegerxwîn ûsn. pêşkêş kenê. Ma rêzdarîya xo seba Rayberê Şarê Kurdî Abdullah Ocalan û seba heme şehîdanê xo pêşkêş kenê. Ma xeylê sipasîya xo seba Rayberê Şarê Kurdî Abdullah Ocalanî kenê ke nê îmkanî dayo ma ke ma na komxebate bikerê. Ma sipasîya xo seba heme temsîlkaranê kurd zî kenê. Birêz Abdullah Ocalan vano ke, ‘Ziwan seba neteweyêkê nan û awe ra muhîmêr o. Kes û neteweyê ke ziwanê xo yê dayîke ra bêpar ê heywanan ra zî nimzêr ê.’ O semed ziwanî sey laşê merdiman pênase keno û vano ey rê wayîr vejîyê.”
‘Xebatê ziwanî encamê têkoşînê têgêrayîşê azadîye yê’
Heval Dilbihar dîyar kerd ke tayê kesî vanê têgêrayîşê azadîye seba ziwanê Kurdkî zaf çîyêk nêkenê û wina dewam kerd: “Eke ewro tayê kesî eşkenê xebatanê ziwanî bikerê, no bi sayatêkoşînê têgêrayîşê azadîye û şarê kurdî yo. Ma do bi na komxebate têkoşînê xo yê seba ziwanê Kurdkî biresnê merheleyêka bîne. Birêz Ocalan heme temsîlkaran reyde prosesêk da destpêkerdene. Heta ke heme qanûn û qanûnanê bingeyînan de statu û perwerdeyîya bi Kurdkî nêra qebulkerdene, ne aştîyêka rast û menda yena awan kerdene, ne zî komelêko demokratîk yeno awankerdene. Ganî ma tîya de problemanê heme qadanê ziwanî nîqaş bikerê. Ma seba Kurdkî nuqteyêka rexnedayîşî de yê. O semed ra ganî ma polîtîkayanê xo yê seba têkoşînê ziwanê Kurdkî dîyar bikerê. Komxebata ma sey nêmkomxebata şarî ya zî. Xeylê komxebatî ameyê kerdene labelê nêmcet mendê, dewamê înan nêameyo. O semed ra na komxebate gelekî muhîm a. Na komxebate seba Rayber Ocalan, cangorîyan û şarê ma pîroz be.”
