Platformê Pawitişê Zozananê Hesendînî yê Pasûrî seba pawitişê awe û herra xo mîtîngêk organîze kerd. Mîtîngî de ame vatene ke do Kurdîstaan nêdê sermîyandaran.
Bi pêşengîya Platformê Pawitişê Zozananê Hesendînî yê qezaya Pasûrî ya Amedî seba ke awe, xoza û herra derûdorê Hesendînî merkezê Pasûrî de mîtîngêk ame kerdene. Rayberê partîyanê sîyasî, temsîlkarê rêxistinanê sîvîl û bi seyan welatijî beşdarê mîtîngî bîyê. Dovîz û pankartê ke mesajê pawitişê awe, xoza û herre dayêne, ameyê girewtene.
‘Ma do Kurdîstan nêdê înan’
Hemşaredarê Pasûrî Murat Îpek ewil qisey kerd û bale ant talankerdişê Hesendîn û xozaya ci ser o û wina vat: “Seba ke Kurdîstan zaf weş a hêrişî aye ser o yenê kerdene. Heme ca de vîrameyîşê ma est ê. Wazenê vîrê ma pûç bikerê. Ma do têkoşînê xo gedeyanê xo rê verdê. Çemê Pasûrî ziwa kerd, şarê ma xapêna. Wazenê zengînîya ma ya xozayî çin bikerê. Bi desan dewê ma ameyê vengkerdene û hema zî veng benê. 8 dewê Hesendînî bêawe yenê verdayene. Ma do Kurdîstan nê destanê ê sermîyandaran.”
‘Ma kilamêka herra xo nêdanê bi zerrnanê înan’
Rayberê Komela Ekolojî yê Amedî Nejdet Sezgîn zî qisey kerd û îfade kerd ke vetişê madenî bi sereyê xo felaketêk o û no zî awa binê herre bi jehr keno û wina vat: “Şarê Pasûrî serewedaritişê xo nîşanê Tirkîya û pêroyê dinya da. Vetişê madenî reyde do tîya de cuye biqedîya. Kam se vano wa vajo, ma kilamêka herra xo nêdanê bi zerrnanê sermîyandaran. Ma do seba erjanê xo, tarîx û nasnameyê xo wayîrê Hesendînî vejîyê. Ma do mil bidê yewbînan û pîya seba pawitişê herra xo têkoşîn bidê. Ganî ma pîya bibê. Pawitişê herra xo, pawitişê cuya ma yo.”
Hetkara Serekê Baroyê Amedî Şîlan Çelîk Şîmşek û Hemserekê DEM Partî yê Amedî Abbas Şahîn zî bi kilmkî qiseykerdişê xo kerdî û bale ant talankerdişê xozaya Kurdîstanî ser o.
Mitîng bi deyîranê Azad Bedranî qedîya.
