Şaredarîya Amedî ya Şaristanê Girdî seba ke toximê herême bêrê pawitene û vilakerdene, Kitabxaneyê Toximan awan keno.
Serekîya Daîreya Vurîyayîşê Hewayî û Eşteyê Sifirî, Wendexaneyê Agroêkolojî û Hewayî de do kitabxaneyêko toximan awan bikero. No kitabxane do toximanê herême kom bikero, bipawo û reyna bido vilakerdene. Bi no qayde hem toximê ke kom benê do bêrê pawitene hem zî do mîrasêko muhîm bimano neslê ameyoxan rê.
Kitabxane do qezaya Kayapinarî de bi kerpîçan bêro viraştene û do materyelê tebîî bêrê xebitnayene.
‘Do toximê herême bêrê komkerdene û vilakerdene’
Koordînatorê Wendegehê Agroêkolojî û Hewayî Bişar İçlîyî dîyar kerd ke aşma adar de kitabxane do bêro akerdene û va: “Ma wazenê toximanê herême dewan ra kom bikerê. Bi taybetî toximê ke yê Mezopotamya yê wazenê kom bikerê û vila bikerê.”
‘Amancê ma xoresnayîşê werdêko weş o’
İçlîyî va ke toximê herême vînî benê û toximî binê kontrolê şîrketan de yê. Ey va ke ê do rencberan reyde pîya bixebitîyê û toximan reyna kom bikerê. İçlîyî wina dewam kerd: “Armancê ma resayîşê werdêko weş o. Ma do cayê xo yê agroêkolojî de bê dermananê kîmyewîyan, bi metodanê tebîî û tradîsyonan berhem bigîrê.”
Muracat
Kesê ke wazenê piştî bidê Kitabxaneyê Toximan şênê bi nê numreyî 0412 229 48 80 – 4701 yan zî adresa e-posta ya [email protected] reyde têkilî ronê.
Şar eşkeno Kayapinarî de Serekîya Daîreya Vurîyayîşê Hewayî û Eşteyê Sifirî (Bulwarê Dîcleyî, Taxa Talaytepe 4007/2 Kuçe No:4, Het Tesîsê Pakkerdişî yê DÎSKÎ) de muracaat bikero.
