Dayîkê Şemeyî kombîyayîşê xo yê 1068. de aqûbetê Kenan Bîlgînî pers kerd ke 12ê êlûle 1994î de Ankara de badê destbendkerdişî vindî bîyo. Birayê Bîlgînî û şahidê dewa Cavît Nacî Tarhanî mesajêk şawit ke çalakî de ame wendene.
Dayîkê Şemeyî ke her hefte Meydanê Galatasarayî de seba perskerdişê aqûbetê nêzdîyanê xo yê destbendkerdişî de vindbîyayeyan û waştişê muhakemeya faîlan yenê têhet, no hewte seba Kenan Bîlgînî ke 31 serrî yo vindî bîyo, ameyî têhet. Beşdarî bi qerenfîlan û fotografanê vindbîyayeyan destanê xo de meydanî de ameyî têhet.
Kenan Bîlgîn îşkence de ameyo dîyene
Beyanatê çapemenîye nêzdîya vindbîyayeyan Setenaye Yarici da. Yarici vat ke Kenan Bîlgîno 35 serrî 12ê Êlûle 1994î de îstasyonê otobusî yê Ankara Dîkmenî de ameyo destbendkerdene û ameyo berdene Mudîrîya Emnîyetî ya Ankara. Yarici vat: “Emnîyetê Ankara destbendkerdiş înkar kerd. Labelê 11 şahîdanê îfade da ke Kenan Bîlgîn şûbe de îşkence de dîyo. Çiqas keyeyî muracaat kerd zî dosya ameya girêdayene. AÎHM zî na dewa dekerd qeydanê xo labelê Tirkîya de faîlî hema yenê pawitene.”
31 serrî yo faîlî yenê pawitene
Birayê Bîlgînî Îrfan Bîlgînî zî çalakî de qisey kerd. Îrfan Bîlgînî îfade kerd ke dejê vindkerdişê birayî hema teze yo: “Çiqas her çî dosyayan de aşkera bo zî dewa nêabîye. Dewlete faîlî pawitî. Labelê ma vanê sûcanê verba însanîyetî de mudetê wextî çin o. 30 serrî zî ravêrê 100 serrî zî ravêrê nê însanî do nêrê vîrkerdene.”
Dayîkê Şemeyî peynîya beyanatî de vat: “Seba Kenan Bîlgînî, seba heme vindbîyayeyanê xo ma qet fek waştişê adaletî ra nêverdanê.”
