Hemserekê MED-DER’î Remzî Azîzoglu hêrişê ziwanê Kurdkî û kongreya MED-DER’î ser o vat ke her tim ziwanê Kurdkî ser o hêriş bîyo la înan xover dayo û kesê ke wazenê nê xebatan de ca bigîrê, ê paweyê înan ê
Tirkîya de her ke şono polîtîkayê asîmîlasyonî zêdîyenê, verba nê polîtîkayê lêşînî de zî sazgeh û dezgehê ziwanî, xebatanê xo domnenê. Nê sazîyan ra tewr muhîm Komela Cigêrayîşê Ziwan û Kulturanê Mezopotamyayî (MED-DER) ya. Polîsan hêrişê banê MED-DER’î kerd, rayber û hemserekê sazîye girewtê binçiman la sazîya MED-DER’î xebatanê xo yê ziwanî domnena.
3ê Çileya 2025î de do MED-DER şêro kongre. Hemserekê MED-DER’î Remzî Azîzoglu hêrişê ziwanê Kurdkî û Kongreya MED-DER’î ser o ajansa ma rê qisey kerd.
Hemserek Remzî Azîzogluyî dîyar kerd 2023î de serrnewe de ê dekewtbî rayberîye, di serrê ê temam bîyê û êdî ê do kongreya xo virazê û wina vat: “Rayberîyêka newîye awan bikê. 2024î de şima zî zanê ziwanê Kurdkî ser o hêrîşî virazîyayî, esas her tim hêrîşî est bî la na rey sazgehan ser o zî ame kerdene. Gelekî embazê ma ameyî destbendkerdene. Çîyêk zî çin bî eslê xo de la înan waşt ters û xof dekerê zerrîya embazanê ma yê ziwanhesan, ganî ma xo nê psîkolojî ra vejîyê. Tewr peynî mamosta Rifat Ronî mendbî, 3 aşmî bîllesebep o zere de tepîşt. O zî vejîya ma reyde yo nika.”
Rayberîya newîye awan kenê
Remzî Azîzoglu eşkera kerd ke ê xebata xo dewam kenê, ê fek ziwanê xo nêverdanê û wina domna: “Rayberîya newîye ez bawer kena ke ê zî do dewam bikerê, ma zî do hetkarî bikerê. Eke ma zî rayberî de bibê xo ra ma kenê eke ma tede nêbê zî ma do paştî bidê embazan. Kongreya ma 3ê çeleyî de ma do bikerê, pêrar zî ma 3ê çeleyî de kerdbî. Sazgehanê xo reyde ma mabênê xo de kenê, ma melumat dayo endamanê xo, ma do rayberîya newîye awan bikê.”
Ma paweyê embazan ê
Azîzoglu wina qedîna: “Embazê ke wazenê rayberîya ma de ca bigîrê wa kerem bikerê bêrê. Xo ra ma embazanê xo yê endaman ra vato, kesê ke wazenê nê xebatan de ca bigîrê, ma paweyê înan ê. Nê rojê peyên ê. Ma zî raporê hazir kenê, hazirîya kongreya xo kenê. Ma paweyê embazan ê.”
