Rayberê Weqfa Koçî û Hetkarîya Merdimîye Lokman Amacî derheqê Meclîsa Gedeyan û amadekarîya Kitabxaneyê Amed Donatî dîyar kerd ke seba paştî bidê gedeyan xebatê înan dewam kenê û vat: “Ma hêvî kenê ke seba kitabxaneyî her kes ma rê kitaban bierşawo.”
Amed de 22ê gulane de Meclîsê Gedeyan ame eşkerakerdene. Meclîs seba gedeyan dest bi xebatan kerd. Xeylê sazî mîyanê meclîsî de ca gênê. Weqfa Koçî û Hetkarîya Merdimîye zî mîyanê meclîs de ya. Rayberê weqdî Lokman Amacî derheqê meclîs û amadekarîya awankerdişê Kitabxaneyê Amed Donatî de ajansê ma rê qisey kerd.
‘Ma do Kitabxaneyê Amed Donatî awan bikerê’
Lokman Amacî îfade kerd ke do seba gedeyan kitabxaneyo bi nameyê ‘Amed Donat’ awan bikerê û vat: “Amed Donat gedeyo ke ma bûrs dayêne, o bi. Ey serra 2022î de cuya xo vîndî kerd. Eke ewro şertê heme gedeyan yew bibîyêne, beno ke Amed Donat do cuya xo vîndî nêkerdêne. Ganî mabênê gedeyan de hende cîyayî çinba. Seba ke ma kitaban biresnê gedeyan ma do kitabxaneyî akerê. Seba nê zî lazimtî bi kitaban est a. Ma paweyê kitaban ê. Ma seba gedeyanê ke îmkanê înan kêm ê xebitîyenê. Seba ke bieşkê perwerdeyê xo bidomnê, ma piştgirîya bûrsî danê înan. Meclîsê Gedeyan binê Şaredarîya Amedî ya Şaristanê Girdî de abi. Heme sazîyê Amedî endamê meclîsî yê.”
‘Ma xebatanê xo bi hewayêko zafziwanî kenê’
Lokman Amacî dîyar kerd ke her roje ziwanê Kurdkî kêm yeno qiseykerdene û wina vat: “Seba ke gedeyî bi ziwanê xo yê dayîke qisey bikerê, ma xebatanê xo bi hewayêko zafziwanî kenê. Ma seba înan nimûne yê. Ganî ma zî her ca de Kurdkî qisey bikerê. Ewro kesê pîlî seba gedeyan qerar danê. Ma nê nêzdîbîyayîşî qebul nêkenê. Seba ameyoxî ganî ê bi xo qerar bidê. Ganî kesê pîlî tena paştî bidê gedeyan. Mîyanê weqfa ma de zî komîsyonê gedeyan est o. Ma tîya de seba her qade paştî danê gedeyan. Serre de reyêk ma vera binpaykerdişê heqanê gedeyan cigêrayîş kenê û rapor amade kenê. Seba binpaykerdişê heqanê gedeyan bêrê vînayene, nê raporî muhîm ê.”
