Endama Rayberîya Meclîsê Cinîye ya Sûrî Arîfe Bekir va ke armancê hêrişê vera Suwedayê de çinkerdişê kulturê zafrengî yê Sûrîye yo û vera hêrişan de avzelî bi yewbîyayîşî heme pêrabesteyanê Sûrî est o.
Bi ameyîşê Heyet Tehrîr El Şam (HTŞ) ya cîhadîstî ya ser rayîrberîya Sûrîye, welat ver bi rewşanê telûkeyî ra şona. Roj be roj qirkerdiş, remnayîş, destdergî û heme tewir rêbazanê dijmerdîmeyî yenê kerdene. Bi xususî estbîyayîşê perabesteyanê Sûrîyeye binê telûkeyî de yê, tewr peynî bi hêrişê ser Suweydayê nîşan dano ke verdewamîya qirkerdişê qeraxî yê û çinkerdişê welatijanê herême yê. Armancê hêrişan, çinkerdişê pêrabestayan ê û awankerdişê hişmendîyêka faşistî û netewperestî û dewletêka îslam ya cîhadîsta.
Endama Rayîrberîya Meclîsê Cinî ya Sûrî Arîfe Bekir derheqê hêrişanê ser durziyan û serebûtanê ke Sûrîye de pê yenî û rewşa cinîyan a rewşa estî de, JINHA’yî rê ercna.
‘Şarê Sûrîye binê telûkeyê qirkerdişan de yê’
Arîfe Bekir da zanayêne ke qirkerdişê ke nika şaristanê Suweydayê de yenê cuyayêne, verê nika bi heman qaîdeyî qeraxê ser elewîyan ame kerdiş, ewro roj Sûrîye de heme şarê bînî binê tehlukeyê qirkerdişan de yê û wina va: “Hetanî nika nê qirkerdişan de eynî çik bi sere şaranê Efrînê, Girê Spî û Serkaniyê de zî kerdê, nika zî sey verdewamîya înan Sûrîyeya pêroyî de virazenê û şarê ke Sûrîye ciwîyenê heme binê telûkeyê qirkerdişan de yê. Her wina nika Suweydayê de zî hêrişan kenê û tewr zaf hêrişê cinî, doman û îxtîyaran ra kenê. Nê çeteyê ke qirkerdişan kenê wa bêrê cezakerdêne. Avzelîya şaranê Sûrîye bi yewbîyayîşî est o, bi şer tu çik nîno çareserkerdêne.”
